U Symbood Montri Rangbah ka jylla uwa pait leh ya ka chnat District Council Affairs (DCA), u Prestone Tynsong da ong u wa kitu ki bru kiwa kwah wow kylliang ya ka Sixth Schedule toh u ngam rap yillu ki.
Hawa klam ha ka yalang pynlait kot wa thooh bniah ka KHADC, u Prestone da pynkynmoo u yei por wa ka sorkar India dang thmu ko wow pynman aiñ ya ka Citizenship Amendment Bill (CAB) ha itu i por, kawa da kylla won kam ka Citizenship Amendment Act (CAA).
Da ong u wa waroh kawi ka thaaiñ North East da chit ko hadooh wa u Montri Rangbah, u Conrad K Sangma da khut u ya ka yalang kiwa mihkhmat ka thaaiñ ha Guwahati, kiwa da lai won cha Delhi wow yakhun pyrchah ya kani ka aiñ.
Chooh chooh da ong u wa i por wa u Amit Shah yachem u wa ki seiñ na Meghalaya wa kynthup leh ya ki seiñbhalang wa ki Party, du chi kyntien u Amit Shah da jubab u wa lada man aiñ ka CAB ym ktah ko ya ka Meghalaya neibhah wa em ko hapoh ka Sixth Schedule wei da pynlait leh ya ka na kani ka aiñ.
U Prestone da ong u leh wa hap wow pynkynmoo ya ini i bor ki District Council neibhah wa da em kiwa ong wa kwah wow kylliang noh ya ka Sixth Schedule, deiwa pynrap wa toh ki District Council kiwa yada ya ka jylla kawa em le jaitbru, ki Khasi, Jaiñtia wa Garo.
Heiyatoh wa kiwa kwah wow wanrah da ka Article 371 ha i thaw ka Sixth Schedule, u Prestone da ong donhi u wa katni em kiwa ong wa da toh i por wow kylliang noh boi wa ka Sixth Schedule ymtoh kawa emkaam.
Da ong u leh wa ym kwah u wow yania tangwa khut u ya kitæ ki lok wa sñiawthooh bakla deiwa ong ya ki wow ngam yillu ki wow sñiawthooh yei bor ka Sixth Schedule.
Discussion about this post