Ynne ka 1 tarik da man ko ka sngi wa nyngkong dooh wa krehkaam ki 3 tylli ki aiñ thymme kiwa yatoh wa ki kaam pyrchah aiñ wei kawi na ki FIR wa nyngkong dooh wa da e hapoh ka Bharatiya Nyaya Sanhita (BNS), 2023 toh ha Kamla Market Police Station ha Delhi pyrchah ya uwi uwa chongdai madan hajan kawi ka yingkieñ lai kjat neidaw wa pynthut u yei lai i wan cha New Delhi Railway Station wei da chah pynngat u hapoh ka Section 285 ka BNS.
Kani ka FIR toh kawa da e ynne i step synyaaw heipor 12:15 da u SI Kartik Meena uwa da ong wa heipor wa lai uiñ sonteri u, da yoo u ya u bru wa dai Sapieñ hajan ka paikhana wa em hapoh kani ka yingkieñ lai kjat wei da dai u leh deilang waka um, sikret wa kiwi de heiwa da phah kyrriah ya oo neidaw wa da pynthut u yei lai i wan tangwa ym ap u yeiwa ong.
Uni u bru wa yoh ya ka FIR wa nyngkong da tip ya oo kam u Pankaj Kumar (23 snem), uwa na Bihar.
Kini ki aiñ thymme toh kiwa da sdang krehkaam ha waroh kawi ka ri yow pyndam noh ya ki aiñ warim kiwa nadooh ki por wa synchaar ki pharæng tangwa kitu kiwa da chah pynngat chwa ha ki kyndon warim ka IPC wa CrPC u pteiñ u bichaar ki da kini ki kyndon.
Tangwa nadooh myntu ka sngi hadooh i rukom takit ki pulit u bood i katkam ka Nagarik Suraksha Snhita (BNSS) ymtoh toh de katkam ka CrPC wei ki kyndon wa chah pynngat u man ki hapoh ka BNS ymtoh de hapoh ka IPC.
Ini mut i wa ka Bharatiya Nyaya Sanhita (BNS) da mih ko heithaw ka Indian Penal Code (IPC), ka Bharatiya Nagarik Suraksha Sanhita (BNSS) da mih ko heithaw ka Code of Criminal Procedure (CrPC) katwa ka Bharatiya Sakshya Adhiniyam da mih ko heithaw ka aiñ Indian Evidence Act wei kini waroh nadooh myntu da tynyap ki ya kini ki aiñ warim lait noh ya kitu kiwa da chah pynngat ha kini ki aiñ warim chwa ynne ka sngi heiwa ka takit pyrchah ya ki u man ko katkam ki aiñ warim.
Discussion about this post