Ka Dorbar Chnong Umkiang da pynsñiaw ko yei sñiawdiaw hajrong wym krehkaam bha ka Mobile Network ka Jio hapoh ka chnong Umkiang. Da ong wa i wym krehkaam bha toh neidaw wa suki ka Internet iwa pynman yaki paidbah chong chnong ka thaaiñ Umkiang wow yoh yutip ki nadooh ki khubor khamtam ya kitu kiwa chong chnong kiwa dooh wa duk ki wym yoh de wow lai kreh mylla kiwa da hap wow yaleh yei e yarap ka sorkar lyngba ka Online kam ka poisa e yarap ka sorkar.
Kamtæ da kyrpaad ya ka sorkar wow phah ya katai ka Company Jio wow pynbiang ya ka Network ha kam ini i por yong u COVID-19, khnang wow man i myntoi wa salonsar da ong u Nicholas Lyngdoh, Secretary chnong Umkiang.
Neiliang ka Khasi Students’ Union (KSU) Sonapyrdi Unit deilang wa ki paidbah chong chnong da pynsñiaw ki yei sñiawdiaw yei wym biang ka Mobile Network Jio wa Vodafone. Kini ki ar tylli ki Company ym ye ki wow chakri deiwa pynhun ya ki paidbah chong chnong, da ong ka seiñ.
Kamwa man kattæ em du ar tylli ki Sim Card wa pynemkaam ki paidbah, kawi ka Jio wa ka Vodafone. Tangwa kini ki Company da chim kabu ki yaki paidbah. Ka seiñ da kyntu ko ya kitai ki Company wow pynbiang Network khnang wow pynsuk ya ki paidbah khamtam ha kam kini ki por wa chem chitom ki paidbah neibhah ki Mobile Network yarap ki wow pynchngaaiñ yaki bru wei kamjooh wow yoh yutip wa emkaam ki, da ong u WD Gympad, General Secretary KSU Sonapyrdi Unit.
Discussion about this post