Ka East Jaiñtia National Council (EJNC)-Khliehriat Circle, mar ya yoh yutip ko wa em i oor i kynroh yong ka Khliehriat CHC, East Jaiñtia Hills District, kiwa yahkhmat yong ka EJNC-KC da hiar ki wut wut cha katai ka thaw wow sylli yeiwa jia.
Ha i lai sylli da chem wa katai ka kynroh da oor ko heipor 12:30 hadooh 1:00 waje i pyrdi synyaw, ka seiñ da ong ko wa ini oor ini i kynroh da pynchong sier ko ya kiwa boon walang nadooh ki wakreh ka CHC, kiwa thiah kjut hadooh kiwa chong chnong wa em marjan wa katai ka CHC.
Ka seiñ da kam ko leh wa da chem ko wa ym em skem i khyndaw iwa da pynman ya itai i kynroh wow oor i neidaw wa joor u slap, wei lada i chna ya katai ka kynroh dang slem i, daw booh ko yaki paidbah hapyrdi i maa wa khroo khamtam ha kam kini ki por ba joor palat u slap.
Neibynta i myntoi yong ki paidbah, ka EJNC-KC da kyntu ko yaka chnat Revenue & Disaster Management wow chimkhia wow phah chna smat ya katai ka kynroh kawa da oor yong ka CHC Khliehriat neibynta ka chongsuk chong chngaaiñ yong ki paidbah, pynkut ka kyrwoh na u Evident Tariang, President EJNC-KC.
