Ka India ynne hawa pynche chaphang ka Operation Sindoor da ong ko wa da leh yeini hadien wa ka Pakistan ym bien ko wow leh iyi iyi leh ya kiwa emkti u siat yap ya 26 ngut ki bru ha Pahalgam wei da tip leh wa da em kiwa pynkhreh wow leh biang kam kini ki jooh ki kaam pyrchah ya kiwa chong chnong ka India, kamtæ da rai wow siat ya ki thaw wa da tip tikna wa em kini ki bru kam wow yada ya ka ri.
Neiliang ka Col. Sofia Qureshi wa ka Wing Commander Vyomika Singh da pyntip ki wa da em hadooh 21 tylli ki Terrorist Camp ha ka Pakistan Occupied Jammu & Kashmir (POJK) wa hapoh ka Pakistan wei na kini dadep siat tympra ya 9 tylli kam chibynta ka Operation Sindoor.
Da ong leh kini ki Terrorist Camp toh kiwa pynemkaam yow hikai kammon wow choon ya ka India kamjooh kammon wow pynemkaam ya ki tiar yasiat.
Da jied wow sait ya kini ki 9 tylli ki Terrorist Camp toh hadien wa da tip tikna ya ki kaam wa leh ki wei heijooh i por leh dei wym chah ktah ki bru paidbah.
Kini ki Terrorist Camp wa em hapoh ka Pakistan Occupied Jammu & Kashmir toh ka Sawai Nala ha Muzaffarabad, ka Stedna Bilal ha Muzaffarabad, ka Gulpur ha Kotli, ka Barnala ha Bhimber wa ka Abbas ha Kotli katwa kiwa em won hapoh Pakistan toh ka Bahawalpur, Muridke, Sarjal wa Mehmoona Joya.
Kiwa da pynyoo lyngba ki dur wa ki Video ya ki thaw wa chah siat toh ka Syedna Bilal (POJK), Kotli Gulpur (POJK), Bimber (POJK), Kotli Abbas (POJK), Sarjal Sialkot (PAK), Mehmoona Joya (PAK) wa Markaz Taiba Muridke (PAK).
Da ban joor wa ha ini i lai siat ym em siat ya kiwon kiwon ki thaw yong ki chipai ka Pakistan tangwa lada ka Pakistan pyrchang ko da iwon iwon iwa bakla daw pynjoor i yei kynaad.
Da pyntip leh wa du ha ki 10 snem wa da lai, da em palat 350 ngut ki nong India wa da yap ha kini ki Terrorist wa wan da kylla pood wei kiwa mynsoo da em ki 800 ngut. Da em leh palat 600 ngut ki chipai India kiwa da yap wa palat 1400 ngut kiwa mynsoo.
Discussion about this post