Hadien wa mih noh ki pulit CRPF na ka chnong Umlaper, kawa em hapoh ka Raid Nongtung, Ri-Bhoi; ki pulit ka jylla Assam da lai ki wow booh ya ka ktem ha katai ka chnong deilang wa kawi ka Check Gate wow talasi ya ki kari kiwa lai wa wan, wei ynnin i miet ki pulit ka Assam da talasi ki ya kawi ka kari ki khynroo na ka chnong Umlaper, wei da dat ki leh ya kini ki khynroo.
Hawa yoo ya ini i jia, neiliang ki paidbah ka chnong Umlaper, Ummat wa ka chnong Pdengtleit da mih ki wow tympra noh ya ka Gate wa da booh da ka Assam wei da lai ki leh cha i thaw sah ki pulit Assam wow dawa wa ki toh u mih ki chi syndon na katai ka chnong.
Hadien wa da yoh yutip ya ini wa jia, neiliang u MDC ka Mawhati, u Charles Marngar da lai u bran bran cha katai ka thaw yow chem yeiwa sakhiat, heiwa da pyntip u ya ini i jia cha ka Deputy Commissioner ka Ri-Bhoi kawa da chimkhia. Hadien kamwa chi kynta da poi leh u DSP wa u In-Charge na Mawlasnai Outpost wei hadein kattu katni por da wan poi sa u SP, DSP, ADM wa Border Magistrate wei kamjooh leh u SP yong ka Hamren West Karbi Anglong.
Katkam ka yutip wa da yoh da pyntip wa hadien i yaklam hapyrdi ki arngut ki SP, neiliang u SP ka Hamren da pdiang u wow sai noh ya ki pulit wa ya ka Check Gate na katai ka chnong kawa ki paidbah da tympra ki.
Neiliang u MDC da yaroh u leh ya ki pulit ka jylla Meghalaya kiwa da chim khia ya itai iwa da jia, wei da ong u wa lada ka chnat pulit chimkhia ko, ym em iwon iwon i eh neini chakhmat.
Da pyntip leh wa hadien wa lai tuklar u MDC wa ki bor District, ki pulit da ye ki wow pynbait noh ya itai i kaam, heiwa da khutlang ya u pulit wa dat ya kini ki khynroo wei dei ya hunlang waroh arliang, utai u pulit da paan maap noh u wei ki khynroo yong ka thaaiñ leh da ya maap noh ki wei neiliang ki pulit ka Assam da su ki leh yaka bai lutsan waroh.
