U President ka Russia, u Vladimir Putin da paan maap u na ka ri Azerbaijan hadien haap ka lieñsuiñ ko kawa hær najrong ka Russia heiwa da em 38 ngut kiwa yap tangwa ym em won bien u wow bahkhlieh wa toh ka Russia wa leh tæ jia ini.
Kam wow pynkynmoo wa kani ka lieñsuiñ ka Azerbaijan Airlines da haap ko hajan i thaw wa tip kam i Aktau ka ri Kazakhstan heiwa da yap 38 ngut na ki 67 ngut kiwa em hapoh.
U Putin da ong u leh wa ha ka 25 tarik heipor wa jia ini, ka Russia dang siat ko ya ki Drone ka Ukraine tangwa u President ka Ukraine, u Volodymr Zelenski da kyntait u yeini.
Kiwa boon da ngiat ki wa kani ka lieñsuiñ da chah siat ko ha ka Russia hadien wa mut ko wow hiar ha Chechnya kawa em ha kti ka Russia heiwa da hap dong ko cheiliang ka Caspian Sea wei da haap ko hajan Aktau, Kazakhstan wei kiwa em hapoh kiwa boon toh na Azerbaijan deilang kiwa na Russia, Kazakhstan wa Kyrgyztan.
Kiwa boon kiwa yap toh kiwa chong cha tdong kani ka lieñsuiñ kawa da hær na Baku, Azerbaijan cha Gozny, Chechnya tangwa da chah siat ko wei da hap ko wow thooh luti da kawi.
Katkam wa pynche da ka Russia, ki sor ka Grozny, Mozdok wa Vladikavkaz da chah hiar thma ki ha ki Drone wei ka Russia da siat ko ya kini tangwa ym em won ong ki wa lada kani ka lieñsuiñ da toh lang ko ha ini i yasiat.
Discussion about this post