Shillong: U montri khynnah ka sorkar pyrdi wa pait ya ka chnat khloo (Environment and Forest, Climate Change), u Babul Suprio da kular u wow yarap ya ka Khasi Hills Autonomous District Council (KHADC) da ka mang tyngka kawa poi cha ka T. 77 klur wow chna ya ka Research Centre ka Forest and Environment ka District Council ha Meghalaya.
Ya ini da pyntip da u Deputy CEM ka KHADC u Pyniaid Sing Syiem ha i yachem ki MDC ka Council ya u MoS ha nongbah New Delhi. U Pyniaid da yakhmat u ya ki MDC cha Delhi neibynta wow pynyoh yarap poisa cha ka Council lyngba ka sorkar pyrdi.
Da pyntip leh wa da em chwa ka thaw kawa kamwa 3000 Acre tam kiwa man ki thaw khloo kiwa da pynman kam ki Forest Plantation kiwa dai em hapoh i pait ka KHADC.
“Kani ka poisa toh kawa da kular da u montri khynnah ka sorkar pyrdi wei ka mang tyngka toh neibynta u snem 2019-20. U montri da phah wan biang u ya i hadien ka 15 tarik u bnai wow wan khang wow yoh yaklam heiyatoh wa kani ka phang chwa wa ka sorkar pyrdi u mang ko ya kani ka poisa neibynta ka chnat khloo ka Council,” da ong u Pyniaid ynne ka sngi.
Da ong u leh wa hadooh katni ka Council ym pu em ko ki yong ka hi ki thaw kyrpang wow pynmih lane u pynkha ya ki tre dieñ waphær waphær wei ym em leh ka Research Centre.
“Lada yoh ya ka yong i hi ka Centre, ka Council ye ko wow rap pait wei wow thooh bniah heiyatoh wa kiwon ki jait dieñ kiwa mih bha ha Ri-Bhoi, East Khasi Hill, West Khasi Hills wa South West Khasi Hills,” da ong u deiwa pynrap wa kani ka Research Centre daw yarap ko chiboon ya ka District Council khnang wow ye u pynmih tre dieñ (Tree Sampling) yow e cha ki Hima wa cha ki chnong yow yoh ki u thung ha ki khloo kyntang wa ki khloo chnong.
Ha katai ka sngi, ki MDC da e kti ki leh ya ka dorkhat ha u montri deiwa pynsñiaw wa neiliang ka Council ka emkaam ko ya ka laad yarap na ka sorkar pyrdi lyngba ka mang poisa neibynta wow pynkrehkaam ha ka chnat Forest and Environment ka KHADC.
“I heh ki khloo wa pait da ka District Council da man ko 90% wa kynthup ya ki khloo kyntang, khloo adong hapoh ka KHADC wei da em ki kamwa 40 tylli,” da ong u.
Da ong u leh wa ini i yachem wa u montri khynnah ka sorkar pyrdi man ko kam chibynta wa ka Council yow ye ko u chimkti wow chna Scheme thung dieñ nadooh ki bor Hima, Syiem, Sordar, Lyngdoh wa kiwi kiwi ki liang kiwa synchaar.
“I kwah i leh wow pynneh ya kini ki khloo wa kynthup ya ki law kyntang wa ki law adong neibhah wa ka Council leh ka kwah ko wow embynta wow pynneh pynsah ya ka rymaw khamtam hawa yatoh wa ki dieñ ki seij,” ong u Dy. CEM.
Discussion about this post