Shillong: Ka Muay Thai Association of Meghalaya (MTAM) ynne ka sngi da paan yarap ko na ki paidbah kiwa em i mynsien wa kyllooid wow kyrchaan ya ki ar ngut ki kynthai kiwa da chah jied wow chimbynta ha ka lympung ka IFMA World Championship ka wow man ha Cancun ha ka ri Mexico ka wow pynman nadooh ka 10 hadooh ka 19 tarik u Naisan uni u snem.
Hawa klam wa ki laad pathai khubor u President ka MTAM, u Angelus Sun da ong u wa ka seiñ ka em ko hei duna poisa wei da kyrpaad u ya kiwa mihkhmat paidbah wow e ya ka kyrchaan wow yah ya ki ar ngut ki kynthai naka jylla ka Ebilities Diengdoh wa ka Monica Nongrum wow lai yachim bynta ha katai ka lympung.
Da ong u wa natlor wa ka Association ym em poisa ko wei kini kiwa lai yachim bynta leh wan ki na ki manyung wa dooh wa duk na ki chnong nongkyndong wei katkam wa kheiñ malu mala i lut u poi ko cha ka T. 11 Lak tam neibynta ki 4 ngut kiwa mut u lai wa kynthup lang ya u Manager wa chirup wa oo.
Da pyntip u leh wa ha i yachem wa u Montri Rangbah ka jylla, u Conrad K Sangma wa ya u Montri ka kaam yalehke, u Banteidor Lyngdoh ynnin ka sngi, ka sorkar da kular ko wow e yarap ya ki tangwa ym em ong hadooh katwon e yarap ki kamtæ da pynman ya ki wow paan kyrchaan lang na ki paidbah.
Discussion about this post