Paan yarap u Conrad yow chna ya ka Unity Mall kawa T. 431 klur

U Montri Rangbah ka jylla, u Conrad K Sangma ynne da yachem u wa u Montri ka sorkar pyrdi wa pait ya ka chnat Ministry of Commerce & Industry, u Piyush Goyal ha nongbah New Delhi wow paan yei kyrchaan neibynta i kreh ya ka ‘Unity Mall’ wei da khana u leh ya ki kaam wa da leh ha Meghalaya kam ka One District One Product (ODOP) wei u chna ya ka yung krehkaam yow pynchlur ya kiwa seiñ khih wei neibynta ini da e kti u ya ka dorkhat ha u Montri.

Ha ka dorkhat wa da e u Conrad da klam u hajrong ka One District One Product (ODOP) wei wow wanrah ya i talawiar soodong ka Unity Mall Project, kawa man katkam ka thong u Montri Rangbahdooh ka ri wa da kyrchaan ka sorkar pyrdi wa tip kam ka “Make in India” heiwa ya ki mar u chna hapoh ki ODOP.

Ya ka Detailed Project Report (DPR) neibynta ini i kreh da dep e kti cha kani ka chnat sorkar pyrdi ha ka 30 tarik u Naiynru 2023.

U Conrad da ong u wa kani ka Unity Mall Project embynta bha ko wow kyntu kynrong ya i yoh i laa ka jylla wow pynlai yaaw ya ki mar ki mata wa da pynmih napoh ka jylla, u pynku ya ki kaam uiñke suwari kamjooh leh yaka khayi pateiñ. 

Related posts

Kyntait ka Agatha Sangma wow man ka kyrtong MP cha Rajya Sabha

May 29, 2025

Pynlait ka sorkar Rs. 20 klur cha ka JHADC, sa Rs. 19 klur ha ki tayaaw wow wan

May 21, 2025

Chooh chooh da tyrwa ya ka Unity Mall ka wow em ha New Shillong kawa daw man leh ka kam ka nongbah thymme ki yung krehkaam ka sorkar namo ka New Administrative City, ka wow man leh kam ka pdeiñ i khayi pateiñ yeiwa i mang poisa u man i T. 3,000 klur neibynta ini waroh. Da tyrwa u leh ya ka Unity Mall wow chna da ka Ministry of Commerce & Industry lyngba ka Part-VI ka Scheme Special Assistance to States for Capital Investment 2023-24. 

U Conrad da pyntip u leh wa da em ka poisa lyngba ka Externally Aided Project wei ka sorkar jylla dang thooh yarap chooh chooh ko. Ka sorkar jylla da yoh ko leh 1700 Acre i thaw neibynta i yung krehkaam ka New Shillong City wa kiwi ki thaw sikai kam ka IIM Shillong wa ka NIFT ki wow emlang ha kani ka thaw wei na ini da booh 17 Acre neibynta ka Unity Mall i wow man kam wow pynmiat dur ya ka New Shillong City. 

Kamtæ u Conrad da kyntu u ya ka sorkar pyrdi wow kyrchaan poisa ya kani ka Unity Mall Project kawa daw emkaam T. 431 klur yow chna wei ka sorkar pyrdi i da booh bhah ko ya ka Meghalaya T. 132 klur lyngba ka Ministry. Hajrong ini da kyntu u wow pynku ya kani ka poisa wa da booh bhah yow ye u pynkreh ya kini ki kaam wa bha.