I yaleh ka sorkar wow thap pyrtuid hapoh ka on e-Shram neibynta kiwa khih mylla ki wym pu em pynlang pynlum ya idæ namo ki Unorganized Workers da yoh ko yei ya krehlang kiwa boon kawa sdang nadooh ka 26-08-21. Hapoh chi bnai da em palat 1 klur ngut kiwa da thap pyrtuid hapoh ka Website ka e-Shram. Wei hadooh ynne ka sngi da em 1,03,12,095 ngut ki wakreh mylla kiwa da thap pyrtuid kiwa man 43% ki kynthai wa 57% ki chynrang.
Kini kiwa da thap pyrtuid da kynthup ki nadooh ki mistri, kiwa soor that, kiwa khwe, kiwa dai mar cha rood sarok, ki warep, kiwa kamai kari wa kiwi kiwi de.
Katkam ka Economic Survey 2019-20 da em kamwa 38 klur ngut kiwa kreh mylla hapoh ka ri wei da booh thong wow thap pyrtuid ya ki hapoh kani ka Website. Lyngba ini, kiwa lai kreh cha kiwi ki jylla ye ki wow yoh yarap ha ki kaam hawa su wa tda namo ki Social Security.
Ki jylla wa boon wa da wan ki wakreh mylla chakhmat toh ha Bihar, Odisha, Uttar Pradesh wa West Bengal katwa ha kiwi ki jylla wa khian da man ki kiwa duna bha. Heiwa ha Meghalaya, Tripura, Nagaland, Manipur, Himachal Pradesh, Chandigarh, Puducherry, Mizoram, Sikkim, Goa, Arunachal Pradesh, A&N Islands, D&N Haveli wa Daman & Diu, Ladakh, Lakshadweep dang em hapoh 10,000 ngut kiwa da wan thap pyrtuid.
Ini i thap pyrtuid da pyrchang wow pynjoor ha Kerala, Gujarat, Uttarakhand, Meghalaya, Manipur, Arunachal Pradesh, Ladakh, Jammu and Kashmir wa Chandigarh.
Na kiwa da thap kiwa boon dooh toh kiwa em hei rep i riang wa ki kaam chna yung.
Kamwa 48% kiwa da thap pyrtuid toh kiwa em ha ki rta 25-40 snem, iwa pynbood da 21% kiwa em hei rta 40-50 snem, 19% kiwa em hei rta 16-25 wa 12% kiwa em hei rta 50 snem chaneiñ.
Kiwa boon na kiwa thap pyrtuid toh kiwa lai cha ki CSC katwa ha kiwi ki jylla kam ka Kerala, Goa, Meghalaya wa Manipur toh iwa leh ki bru pyn da ki hi ha ka Website. Ini da man i leh i jooh ha ki Union Territory kam ka Dadra & Nagar Haveli, Andaman & Nicobar wa Ladakh. Deiwa kheiñlang 68% toh kiwa thap pyrtuid (Register) deiwa lai cha ki CSC.
Da chna leh ya ka e-Shram Mobile Application yow pynsuk ya ki bru wei ye ki leh wow lai bait ha kani ka Website.
Hadien ini kiwa da dep thap pyrtuid daw yoh ya ka Universal Account Number uwa daw em ha ka eSHRAM Card kawa ye u pynemkaam ha kylleiñ ka ri yow yoh myntoi hei su i tda namo ki Social Security Benefits.
Lada ki wakreh mylla wa em pyrtuid hapoh ka e-Shram chah tyrrah kari, ye ki wow yoh T. 2 Lak lada yap lane tkoh ki na ini wa jia, wei ye ki u yoh T. 1 Lak lada tkoh ki mula mala.
