Kam chibynta yong ka Special Outreach Health Camp, ynne ka sngi neiliang ka Jowai Urban Primary Health Center (UPHC) wa em ha Loomkyrwiang da pynman ko yei e dawai mynkna wa chi sngi ya ki paidbah ka chnong Panaliar, hei yakrehlang wa ka Bansara Eye Care Centre Jowai.
Hei yaklam waka Dr. Rudeimaya Passah, Medical Officer ka Urban PHC da khana ko wa ya kani ka Special Outreach Camp da pynman man u bnai hadien wada chah jied kani ka UPHC wow man kam ka Health & Wellness Centre nadooh u snem 2019, deiwa lai kut ki chnong ki chnat wa haap hapoh i pait kani ka Urban PHC.
Kani ka UPHC kynthup ko ya kamwa 15 tylli ki dong ki chnong, wei chisien wada pynman ya kani ka Special Outreach Health Camp, da emlang bait ki Specialist la ki Dentist, Medicine wa kiwi kiwi.
Hawa kylli yei jait kjut wa rap chem ki lyngba kani Special Outreach Health Camp, da khana ko wa chong katkam i samoi, tangwa ya kiwa palat 30 snem i rta iwa boon hi rap chem ki toh i kjut chini (Diabetes) wa BP.
Kamtæ da kyntu ko yaki paidbah wa hawa pynman ya kam kini ki Health Camp ha ki chnong ki chnat wow chim kabu ki ya kani ka laad deiwa li mih cha ka thaw pynman neibynta i chait i khiah yong ki hi kamjooh leh ka yung ka sem yong ki.
Ha kani ka sngi kiwa da yoh myntoi na ini i wan e dawai wa chi sngi da em ki hadooh 102 ngut.
Neiliang u waheh chnong ka Panaliar u R.Q. Laloo da pynsñiaw u yei sñiawngooh ya kani ka Urban PHC neibhah wa i wan yong ka pynmyntoi ko ya ki paaid wa chong chnong.
