Nadooh wa sdang ki masi wow yoh yei kjut Lumpy Skin Disease hapoh Meghalaya, da em hadooh 100 tylli ki masi wa da yap wa palat 8,000 tylli kiwa da dep chah ktah ha ini i kjut.
Neiliang ka chnat Veterinary da pyntip ko wa da dep e dawai tika ya palat 28,500 tylli ki masi yow ye u yada pyrchah na ini i kjut.
U sahep ka chnat Animal Husbandry and Veterinary Department da pyntip u wa ki masi wa da yoh yei kjut Lumpy Skin Disease (LSD) da em ki 8,177 tylli heiwa 5,884 tylli da chait ki katwa kiwa yap da em ki 101 katkam iwa yoh yukheiñ ka chnat.
Da khana u leh najrong ki 28,500 tylli ki masi kiwa da dep yoh tika da em leh 2100 tylli kiwa da e tika heipor wa yoh ki ya ini i kjut.
Heiyatoh won wa i kjut sñiang, i African Swine Fever da pyntip wa da ye u kdoh u khoom yeini i kjut iwa da pynyap ya 230 tylli ki sñiang hapoh ka jylla nadooh wa sdang uni u snem.
