Ynne ka sngi hadien wa da pynkrehkaam ya ka hukum wow khang noh yei pynemkaam ya ki Plastic wa pynemkaam du chisien donhi katkam ka aiñ Plastic Waste Management (Amendment) Rules, 2021 deiwa bood ryngkat ya ka hukum wa pynmih ha ka 12-08-2021 da ka Ministry of Environment, Forest and Climate Change da lai kynreh ya ki dukan wa pynemkaam ya kini ki jait Plastic ha Jowai.
Ya ini i lai kynreh da yahkhmat da u W.K. Kharbuli, Extra Assistant Commissioner chirup wa ki pulit wa ka chnat Jowai Municipal Board heiwa da lai kynreh ya ki dukan wa em ha tymbud sarok nadooh na Newhill Point, Jowai ter ter chadooh Yaaw Thymme hadooh wa poi ha Laad College, Jowai.
Hawa yoh u yaklam wa u WK Kharbuli da ong u wa ki dukan wa da chem wa dai wei pynemkaam Plastic wa da khang wei kiwa da chah daiñ kuna da em ki palat 120 tylli.
Chooh chooh da pyntip u wa najrong wa daiñ kuna, ki tiar wa da chah knieh kynthup ki ya ki tiar Plastic nadooh ki siang wa ki proh, ki pliang Plastic, ki klat/khuri Plastic, ki pliang sdær, na ki dukan dai baam, kiwa song ya ki baam, wa kiwi kiwi de ki jait dukan.
Ha kani ka sngi da pynsñiawthooh leh cha kiwa chongdai chaphang kani ka hukum wa khang yei dai kamjooh u booh wei wow pynlang ya ki jait Plastic wa pynemkaam chisien donhi.
U Deputy Commissioner ka District, u Garod LSN Dykes da ong u wa ini i lai kynreh daw pteiñ i ha kini ki sngi wa ki tayaw wow wan.
