Ka seiñ Akhil Bharatiya Vidyarthi Parishad (ABVP) West Jaiñtia Hills ynne ka sngi da pynman ko ya i e sikai namo ka Training Camp neibynta ki dkhot wa thymme yong ka ha Yungwalieh ka Dorbar Chnong Chiliangraij, Jowai kam chibynta wow e yarap ya ki khynnah wow pynsñiawthooh ya ki hajrong ka thong yong ka seiñ.
Ha ka e sikai wa da phiah ha ki soo bynta, da pynlai da ki dkhot yong ka ABVP West Jaiñtia Hills.
U Dr. Sashankutlang Khongthohrem uwa man kam u State President yong ka ABVP Meghalaya, da pynsñiaw u wa ka ABVP toh ka seiñ kawa kreh neibynta ki khynnah wei wa boon ki khynnah puræ da wan ki chaphrang wow man kam ki dkhot yong ka khamtam na Ri-loom Jaiñtia nadooh kiwa dang lai Higher Secondary, ki Graduation wa kiwi ki kyrdan puræ.
Chooh chooh da ong u wa boon ki bru sñiawthooh bakla ki wa ka ABVP toh ka seiñ niam namo ka seiñ ki Hindu deiwa pynche wa em chiboon kiwa na kiwi ki jait niam kiwa man dkhot wa ka ABVP wot hadooh wow ksoh kaam ki hapoh ka seiñ.
Da pyntip leh wa da jooh pynman ka seiñ ya ka State Training Camp tangwa neidaw wym chah ki kaam da pynman noh da ka District Training Camp wei kam kani ka e sikai daw pynman leh ha Khasi Hills kamjooh leh ha East Jaiñtia Hills.
Kiwi wa da klam ha kani ka yalang toh u Skhemjingmut Law wa man leh kam uwa kyrchaan ka seiñ ABVP, katwa ka Nibiang Sumer kawa man kam ka State Organizing Secretary ka ABVP da e ko ya ki kyntien pynkut ha kani ka sngi.
Ha kani ka sngi da em palat 140 ngut ki kynnah kiwa yoh myntoi na kani ka e sikai na kylleiñ ka thaaiñ sepsngi ka Ri-loom Jaiñtia.
