U Montri wa pait yaka chnat Kaam Pohyung hapoh ka jylla, u Lahkmen Rymbui ynne ka sngi da pyntip u wa katkam wa yoh lum thup hadooh u Thohlakhmi (Feb) 2021 na ki seiñ kreh mon sñiawbha wa yarap ya ki bru wa da em ha i kaam khayi yei doh i pran, da em ki palat 1500 ngut ki bru kiwa leh ya ini i kaam.
U Rymbui da pyntip u ya ini hapoh ka Yung Dorbar Chna Aiñ hawa pynche hajrong i yatai na iwa kylli wa da wanrah da u MLA ka KHNAM na North Shillong, u Adelbert Nongrum.
U Rymbui da pyntip u wa ha Manbha Foundation East Khasi Hills em ki 371 ngut, ha West Jaiñtia Hills Myntdu Community Social Welfare Organisation 380 ngut, ha East Jaintia Hills Mihmyntdu Community Social Welfare Organisation 157 ngut, ha Ri Bhoi KJPASELDA 305 ngut wa ha South Garo Hills ABIL Gandhian Society 300 ngut.
U Montri da ong u wa neibynta wow yada nei pynemkaam ya ki Hotel wow leh ya ini i kaam, ka sorkar da pynmih ko ya ki kyndon wa ki Hotel toh u bood ki, itæ iwa hap wow phah ya ki dur yong kiwa psiah wa mih cha ki pulit, hap wow e yei riñ na ki CCTV, u booh ya kiwa sonteri namo ki Security kiwa da dep pynbniah, ym toh wow e thaw ya ki wym ye wow pyntipmit ya idæ, ya ki khynnah ym toh wow chah khlem da emlang wa bei ki pa.
U Rymbui da pyntip u wa najrong ki kyndon wa da booh, neiliang ka sorkar da phah ko leh ya ki pulit wow paitbniah ya ki Hotel ha Khyndailad, wei ki Anti Human Trafficking Unit da jooh lai khynra ko hawa suba wa em kiwa leh ya ini i kaam ha iwon iwon i thaw, wei da phah leh ya ki pulit wow uiñ cha sarok yow lait wow yohlaad ya kini ki kaam khayi yei doh i pran khamtam ha nongbah Shillong. Da pyntip u leh wa ka chnat pulit kawa da booh ya ka chnat wa kyrpang (Special Cell) ha Sadar Police Station u pait khnang ko ya ki kaam wa yatoh wa ki kynthai.
Ha iwi won i liang, u Montri da ong u wa emkaam wow pynman yaka ya syllok wa kitu ki bru kiwa leh ya kini ki kaam hajrong i maa wa mih na kini ki kaam wa leh ki khamtam ha i chait i khiah, wei emkaam leh wow pynsñiawthooh ya ki hok yong ki hawa lai wa wan ki, katkam i phah ka Kachari wow yarap neibynta wow kyntu ya ki ha ka puræ puthi, wei e hikai wow kreh ya ki kaam kiwa emburom, wei wow pynpsiah hei pyrkhat pyrdaiñ ki khynroo khyllood wa ki kaam khayi yei doh i pran ym toh iwa bha ya ka imlang sahlang.
