Jowai: U Superintendent of Police, West Jaintia Hills District da pyntip u wa haka 23, 24, 25, 26 wa 27 tarik u Khonchonglad (Nov) wa haka 2 tarik uni u bnai ki chipai ka BSF Muktapur BOP da yoh kem ki waroh 62 tylli ki masi kiwa thmu wow khayi cha Bangladesh ha ki thaaiñ Muktapur.
Kamtæ da kyntu ya ki paidbah wa tip chaphang kani ka kaam wa ki tre masi wow wan ki chakmat ha Muktapur PP.
Ki pulit ka EJH Police won da pyntip ki wa da yoh kem ki palat 2000 tylli ki masi du ha uni u snem 2019 hadooh ka 3 tarik uni u bnai kiwa da thmu wow challan tooh Bangladesh iwa da ye wow kem da i yarap ki paidbah waki 97 Bn, BSF.
Kam wow pynkynmoo haka yachem ki heh ka BSF waka BGB ha Shillong ha uni u snem da yaklam leh yei challan tooh yaki masi heiwa ki chipai ka BSF manda yoh kem ki yaka masi da hap ki wow sumaar ya ki hadooh wa pynmih hukum naka yung bichaar wow e kti ya ki masi cha ki pulit iwa da ktah yei krehkaam ki BSF.
Ka BSF da pnytip ki wa em ki por da hap ki wow sumaar da ki spah tylli ki masi.
Heiyatoh wa ini ka NGO na Delhi kawa tip kam ka Dhyan Foundation da chim ko wow yarap ya ki BSF (ha u pood Indo-Bangladesh) yow sumaar ya ki masi wa da chah kem.
Yow ye u leh ya ini, ka sorkar Meghalaya da booh ki ya i thaw wow pynemkaam chipor wa heh 5 Acre ha Saitsama, West Jaintia Hills District yow booh yaki masi wa kem ka BSF.
Da dep yasoi soskular Memorandum of Understanding (MoU) hapyrdi ka chnat Animal Husbandry and Veterinary, Department waka Dhyan Foundation kawa krehkaam 5 snem nadooh u June 13, 2019 hadooh May 13, 2024.
Ka Dhyan Foundation daw bahkhlieh ko wow pynbiang kari wow kit ya ki masi na ki BSF Post cha ka thaw booh ya ki ha Saitsama deiwa pynlut poisa ki na ki hi.
Discussion about this post