Palat 300 tylli ki skur kiwa em ha ki thaw wym em kiwa chah ktah ha u COVID-19 ha Mizoram da chah wow wai ki neibynta u snem lai puræ namo u Academic Session 2021-2022, da pyntip ka chnat puræ puthi ka jylla.
Ki kyndon thymme wa yatoh wa u COVID-19 kiwa da pynmih da ka sorkar jylla ha ka 8 tarik uni u bnai da chah wow wai ki skur kiwa em cha baar ka Aizawl Municipal Corporation ha ki thaw wym em kiwa chah ktah ha ka khlam.
Ha ka 9 tarik uni u bnai ka chnat puræ puthi da chah ko wow wai ki skur Primary hadooh Higher Secondary ha ki chnong wym em kiwa yoh COVID-19 deiwa pynbait wa ki Deputy Commissioner wei deiwa bood ya ki Standard Operating Procedure (SOP) iwa da pynmih da ka chnat.
U School Education Department Director, u James Lalrinchhana da khana u wym duna ya 376 tylli ki skur ha ki 7 District wa kynthup ya ka Aizawl District, da chah wow wai ki neibynta ka Academic Session 2021-2022.
Da pyntip u leh wa kiwa boon ki skur da sdang ki wow wai wei da em sa 27 tylli ki skur wa em ha Khawzawl District daw wai ki nadooh myntu ka sngi, wei dang pait leh sa kiwi ki thaw kiwa ye wow wai noh ki skur
49 tylli ki skur toh kiwa da chah wow wai ha Aizawl District, 151 tylli ha Champhai, 74 tylli ha Serchhip, 47 tylli ha Lawngltai, 11 tylli ha ha Siaha, 20 tylli ha Saitual wa 27 tylli ha Khawzawl District.
Na ki 11 tylli ki District, 4 District – Lunglei, Kolasib, Mamit wa Hnahthial ym pu em e ki ya ki pyrtuid ki chnong kiwa ym em chah ktah ha u COVID-19.
Da khana u leh wa ki skur da chah wow wai ya ki neidaw wa boon na ki toh kiwa em ha ki chnong wa cha kdong cha chmiang heiwa ym em biang ka Internet, kamtæ yow yarap ya ki khynnah wym biang Internet da wai noh ya kini ki skur deiwa ong leh wa ki Online Class dang pteiñ ki ha ki thaw wa chah ktah ha u COVID-19.
Ki skur ha Mizoram toh kiwa khang nadooh u April uni u snem hadien wa wan biang ka la-ær wa ar ka khlam heiwa ka Mizoram da man ko kawi na ki jylla wa chah ktah dooh ha ka thaaiñ mihsngi deiwa jan em 6000 ngut kiwa dang chah ktah ha u khñiang khlam hadooh ynne ka sngi.
