Palat 3000 ngut ki manbei kiwa chah ieh kurim ha Meghalaya

Ka National Commission for Women (NCW) daw pynman ko yei thooh bniah hajrong ki kaam wa yatoh wa i nang i stat wa i boon ki manbei kiwa chah ieh ha u kurim hapoh Meghalaya kawa man kam ka jylla wa chim jait na ka bei.

Ka Chairperson ka NCW, ka Rekha Sharma kawa wan cha Shillong ynnin ka sngi da ong ko, “Ha Meghalaya, lada khana phi wa em boon ki manbei kiwa da chah ieh kurim næ kiwa chah leh embor, nga kmen palat oo wow thooh bniah. Nga daw phah O ya ka Delina Kongdup (dkhot NCW) wow thooh bniah wei wow pait ya iyi wa ye u leh yow yarap”.

“Tangwa ki manbei wa khlem kurim deiwa jied hi ki, nga tharai O wym emkaam u tuklar tangwa lada toh kiwa chah slaitbor næ chah leh embor, kani won toh kawi won ka bynta wa hap wow tuklar wei yarap ya ki,” da ong chooh chooh ko.

Katkam ka Report hajrong ka ‘Exploratory Study on the Socio-Economic Status and Problems of Single Mothers in Meghalaya’ wa da leh da ka State Commission for Women ha u 2022, da em hadooh 3078 ngut ki manbei ki wym em kurim ha ki 7 tylli ki District napyrdi ki 12 tylli kiwa dadep leh sorjamin namo ka Survey.

Related posts

Da jied ya u Robert Francis Prevost kam u Pope wa thymme

May 8, 2025

Pynkhreh ka sorkar wym duna baam ha Meghalaya lada toh joor ka thma

May 8, 2025

Da ong wa hadooh 46.2% toh ki wym em i stat katwa 28.4% toh kiwa pyndep du ya ka Primary School.

Heiyatoh wa ki aiñ wa dadep pynkrehkaam ka sorkar, da ong ko wa kini daw yarap bha ki ya ki kynthai neibhah lada u bru kular u wow bia wei chongkha wa ka bru tangwa ym bien won u, ya uni u bru ye u chah pynngat ha ka aiñ. Wei hapoh ka aiñ IT Act, lada ki bru klam khlem akor ki ya ki kynthai Online, ye ki wow chah pynngat ha ki kaam wym man ha ki pulit.

Heiyatoh wa ki kaam chah thombor ki kynthai hapoh Meghalaya, ka Rekha da ong ko wa ka thaaiñ North East dang rap chngaaiñ ya ki khynthai lada nujor wa kiwi ki jylla ka ri India.

Chooh chooh da ong ko wa ki kynthai katni da tip bha ki yei hok yong ki neibhah da yoo yei mih pyrthai ki kaam chah thombor ki kynthai wei ini man ko leh nei kreh chitom ki pulit wow takit wei wow Register Case pyrchah ya kiwa emkti wow thombor ya ki kynthai.

Ka Chairperson da ong ko leh wa emkaam ya ka sorkar wow pynman ki yalang pynsñiawthooh paidbah hajrong i hok ki kynthai.