Palat 3,800 ngut ki khynnah na 18 tylli ki skur wa College ha ki District waphær waphær da yoh ki yei sika yow pynpliah ya idæ ha ka liang ka Soft Skill Training wei kamjooh leh wow pynyoo yei sap i phong yong ki lyngba ka Aspire Meghalaya ha uni u bnai wa dep.
Hawa yatoh wa ini, ka sorkar Meghalaya lyngba ka chnat krehkaam yong ka Sports & Youth Affairs deiwa ya ksohkti lang wa ka chnat Education da pynman ki ya ka ‘Aspire Meghalaya’ wa da pynkrehkaam da ka AVENUES, Shillong.
Nadooh wa da sdang pynkrehkaam ya ka ha uni u snem, palat 13,000 ngut ki khynnah wa lai ha ki 62 tylli ki skur wa ki College ha kylleiñ ka jylla da yoh ki wow khait ya u soh i jop na kani ka Aspire Meghalaya. Da em leh 350 ngut ki khynnah kiwa da yoh wow pynyoo yei sap yong ki ha kani ka rynsan.
I thmu yong ka Aspire Meghalaya toh yow pynkhreh ya ya ki khynnah ha kiwa boon ki liang chwa wow sdang ki u thooh kreh wei wow pynchlur leh ya ki wow sai yei sap wei wow pynyoh ya ki Scheme sorkar waphær waphær yong ka sorkar jylla.
Hawa e yei klam ha ka yalang pynkup burom ya kiwa da pyndep yei sikai ha Mawkyrwat, ka Jacqueline Una Kharpuri (MCS), Additional Deputy Commissioner, South West Khasi Hills, da ong ko wa kam kini ki e sikai daw e mynsien ko kammon wow ye u chakri rap bha neibynta ka imlang sahlang wa ka jylla hi waroh kawi khamtam wow yaklam wa kiwi. Da pynchlur ko leh wym toh u mylliñ ya i sikai wa da yoh ki.
U Jakusanrik M. Marak, Class-XII, Dalu Government Higher Secondary School, da ong u wa chwa kani ka e sikai ym tip u iyi iyi ya idæ næ kammon wow e yarap cha ka imlang sahlang. Tangwa kani ka e sikai da yarap ko ya oo wow sñiawthooh yei sap wei da man u uwa chlur ya iwa jooh man u.
Ya kani ka jooh ka yalang da pynman ha Mairang heiwa ka Daphilabet Kharbani, 1st Semester, Nongstoin College da ong ko wa thrang ko wow man kam kawa rwai tangwa ym jooh nood ko neidaw wym em sñiaw skem ko ya idæ. Wei lyngba kani ka chah sikai da yoh mynsien wei da sñiaw chlur ko wow mih ha ki rynsan yow rwai.
Hapoh kani ka Aspire Meghalaya da em leh ki District Talent Committee yow jied ya kiwa napoh ki District cha ka rynsan yakob pynyoo yei sap i phong yong ka jylla heiwa ki paidbah ka jylla daw yoh ki wow chimbynta yow jied ya kiwa jop wei daw tip ya ki kam ki ‘Aspire Meghalaya Stars’.
Ki 18 tylli ki thaw puræ wa da yoh ya kani ka e sikai ha u bnai wa dep toh ka Shillong Commerce College ha East Khasi Hills; Tirot Sing Memorial College, Langtor Higher Secondary School, Kynshi Higher Secondary School wa Pariong Presbytery Higher Secondary School ha Eastern West Khasi Hills.
Ka St. Mary’s Higher Secondary School, Nativity Higher Secondary School wa Hynriew Shnong Higher Secondary School ha South West Khasi Hills.
Ka Nongstoin College wa Lyngngam Presbyterian Higher Secondary School ha West Khasi Hills.
Ka Don Bosco Higher Secondary School ha Ri-Bhoi.
Ka Rymbai Government Secondary School ha East Jaintia Hills.
Ka Sacred Heart Higher Secondary School wa Dalu Government Higher Secondary School ha West Garo Hills.
Ka Loyola College ha East Garo Hills.
Ka Adokgiri Secondary School ha North Garo Hills.
Ka St. Francis De Sales Secondary School ha South Garo Hills.
Wa ka Ampati Degree College ha South West Garo Hills.
