Ka rynsan wow jied ya ki kynthai miat kynthai wa tip kam ka Miss Meghalaya wa Miss Teen Meghalaya 2024 da pynkhriñ ko ya kiwa boon bha ki kynthai khyllood heiwa da em palat 40 ngut kiwa wan pyrchang ha kani ka rynsan wow jied ya kiwa biang tam, kawa da pynman ha Hotel Vivanta Khyndailad ha ka 6 tarik uni u bnai.
Kawa jop ka Miss Meghalaya 2024 daw yoh ko wow sap ya ka pansnget ka Miss Universe Meghalaya wei daw yoh u psiah bait sak cha ka rynsan yakhun ka Miss Universe India 2024. Katwa kawa wan wa ar wa hei wa le daw mihkhmat ki ya ka jylla ha ka Miss Northeast 2024, kawa daw man ha Itanagar, Arunachal Pradesh.
Heijooh i por kawa jop ya ka Miss Teen Meghalaya 2024 daw yoh ko wow psiah bait cha ka yakob Miss Teen Diva 2025, kawa daw man ha Jaipur, Rajasthan.
Ka Miss Meghalaya Organisation (MMO) da pyntikna ko wa ki kynthai khyllood kiwa jop daw yoh ki ka rynsan kawa paka wow pynyoo chooh yei sap i phong yong ki ha ka rynsan yong ka ri wa ha ki kyrdan waphær waphær.
Ka Miss Meghalaya man ko ka rynsan kawa nyngkong wow wai laad ya ki khyllood wow yoh u chimbynta ha ka Miss Universe India.
Ka yakhun wa kut ka Miss Meghalaya wa Miss Teen Meghalaya 2024 daw man ko ha LARITI Multipurpose Hall ha ka 3 tarik u Naikhynde 2024.
Discussion about this post