Ha ka 1 tarik uni u bnai palat 500 ngut ki bru na ka chnong Ïapmala da yoh kjut ki neidaw wa sih i baam wa da e ha ka khawai lehkmen snem thymme wa da pynman da ka chnong Ïapmala kawa em ha East Jaiñtia Hills District.
Katkam i pyntip u MLA ka Khliehriat, u Kyrmen Shylla da ong wa hadien wa da yoh yutip ya itai i jia, neiliang ki bor District wa ka chnat i chait i khiah da leh ki yeiwa emkaam wow e sumaar wa smat deiwa yarap lang leh da ka Kyrmen Foundation wow pynbiang ya iwa emkaam neibynta kiwa chong chnong kiwa da ngat ha itai i sñiawsih.
U MLA da pyntip u wa kiwa chong chnong wa chah ktah bha toh ki khynnah wa kiwa da noh rta, tangwa da chitom ki malu mala deiwa yoh yei prai wei pynhiar kpoh, katwa kiwa dang khynroo ym em da chah ktah ware ki. Da pyntip chooh chooh u wa neiliang ki bor District da phah ki leh ya u Food Inspector wow chim ya ki nongmuna yong i baam kawa da khawai ha katai ka sngi yow chem yei daw.
U Kyrmen da pyntip u leh wa katkam wa da yoh yutip, da em kamwa 12 ngut kiwa da pynthiah ha ki Hospital, tangwa kini leh da lait ki nei maa wei daw chah u liwan yung noh ki mynstep.
Ha iwi i liang, u Kyrmen uwa man leh u Montri ka chnat Social Welfare da pynsñiaw u yei sñiawngooh ya ki bru kiwa emkti wow yarap ya kiwa chong chnong kiwa da ngat ha ini i chitom wa kynthup ya u MDC ka thaaiñ u Dr. Sankey Shangpung , ki khynroo ka chnong, ki bor pynlai District wa kamjooh ya ki Doctor, ki Nurse wa ki wakreh ASHA wa Anganwadi.
