Ynne ka sngi ki pulit ka West Jaiñtia Hills District chirup wa u Wyrta deilang waka Seiñ Kynjei da pynman ki ya ka Nasha Se Azadi Pakhwada deiwa pynsñiawthooh ya i maa wa mih hawa pynemkaam bakla ya i drugs wei ya ka yalang da pynman ha Yungwalieh ka Panaliar, Jowai heiwa u DGP ka jylla, u Dr. LR Bishnoi da man u kam u kongsan.
Ha kani ka sngi da emlang u B.D. Marak, MPS Superintendent of Police, West Jaiñtia Hills, u B. Chhetri, u ASP ka District, ka CW Lyngdoh, Deputy Superintendent of Police, ka Dr. A. Paswet, Psychiatrist, ki dkhot ka Seiñ Kynjei, kiwa sikai kamjooh da emlang leh palat 700 ngut ki khynnah wa chimbynta ha kani ka sngi.
U Dr. Bishnoi hawa e yei klam da batai ya ki jait drugs wa pynemkaam bakla ki bru, heiwa da batai u kammon ktah i ya i chait i khiah kamjooh ya ka yung ka sem wa ka imlang sahlang.
Da batai che u ya ki daw wa boonsien wa ngat ki bru hei pynemkaam bakla ya i drugs deiwa kyntu ya ki khynnah wow kiar na ki drugs khnang wow yoh ya ka mynried kawa tyrchaaiñ.
Ka Dr. A. Paswet hawa e yei klam da batai ko kammon ktah i pynemkaam bakla ya i drugs ya i bor pyrkhat wei kammon yah i ya ki bru wow leh ya ki kaam wa man pyrchah ya ka aiñ wa ka imlang sahlang.
Ha kani ka sngi da yoh leh i klam wa kyrpang na ki ar ngut ki bru wa kynthup ya uwi uwa da chait namo uwa jooh pynemkaam drugs dang nachwa uwa da khana ya ka parom weiwa chem u kamjooh da kyntu u ya ki khynnah wow kiar na i drugs katwa ye. Da yoh leh i klam na kawi ka manbei kawa em ya u khñiang kjut HIV wei kammon wa ye wow yoh dawai wow yoh ya i doh i pran wa chait wa khlan.
Ha kani ka sngi u B.D. Marak, da yaklam u leh wa ki khynnah wei da kylli u na ki khynnah kattu katni hajrong kani ka phang wei kiwa ye u jubab da e sñiawbha ya ki da ki khusnaam.
Hawa kut ka yalang, da yoh yei kyntien khublei na u Arwanki Laloo, u General Secretary ka Seiñ Kynjei.
