Ka 4th Meghalaya Games 2022 kawa dapoi cha wakut ynnin ka sngi hadien 5 sngi deiwa pynman 19 tylli ki jait yakob ha ki 13 tylli ki thaw deiwa em 3000 ngut kiwa chimbynta da man ko kawa heh dooh nadooh wa sdang ya ka.
Ya kani ka lympung da wan wow pynhiar pyrda da ka Chief Secretary ka jylla, ka Rebecca V Suchiang deiwa emlang ka Director of Sports and Youth Affairs, ka WAM Booth, u Working President ka Meghalaya State Olympic Association, u John F Kharshiing, u General Secretary, u Finely Pariat wa kiwi ki dkhot ka MSOA, ki Sports Association deilang wa kiwa yalehke.
Kam wow pynkynmoo wa ya kani ka Meghalaya Games da wai pyrda ha ka 3 tarik ha madan Polo heiwa da em chwa ki yalehke kiwa da sdang nadooh ka 2 tarik. Ya kini ki yalehke da pynman ha kylleiñ ki thaw ka sor Shillong kam ha Laban Indoor Stadium, Shillong Club, Madanrting Indoor Hall, Assam Regimental Centre, NEHU, Mawlai Mawroh Community Hall, Mawlai Madan Heh, Crinoline Swimming Pool, khloo Malki, Shillong Golf Course, NEIGRIHMS wa ha Sports Authority of India Centre.
Ki takma wa da saam da em ki palat 700 tylli wei ya ka yalang pynhiar pyrda da pynman ha SAI Indoor Training Hall heiwa ka Chief Secretary da yaroh ko yei mynsien wa chongchit kiwa chimbynta deiwa ong wa ki man ki katæ ka angnood u Montri Rangbah ka jylla, u Conrad Sangma wow saindur wei wow pynchlur ha ki kaam yalehke.
Da ong ko leh wa da toh i por wa kam ki manbei manpa wow pynchlur ha ki kaam yalehke deiwa pynrap wa chiteiñ na ki skur hapoh ka ri ym em madan yalehke ki, kamtæ u Montri Rangbah da pynkhreh u wow pynbiang ya iwa emkaam yow pynku ya ki kaam yaleh Sports.
Da e khublei ko leh ya ka MSOA, ya u Montri Rangbah, ya u Montri ka chnat Sports & Youth Affairs deilang waka Directorate, ki Volunteers kamjooh ya waroh kiwa chimbynta ha ki yakob waphær yow pynman ya kani ka yakob kawa jop.
Ka Suchiang da saam ko leh ya ki takma cha kiwa jop kamjooh ka khusnaam cha kiwa jop ha ka Athletics wa rah da ka Shillong Sports Association (East Khasi Hills) neibynta ki chynrang, waka Nongstoin District Sports Association (West Khasi Hills) neibynta ki kynthai. Ka West Jaintia Hills da yoh wa ar ko neibynta ki chynrang waka Ri-Bhoi neibynta ki kynthai.
Kam wow pynkynmoo wa u Montri Rangbah ka jylla, u Conrad Sangma ha ka sngi wai pyrda da pynbna u wa daw pynman biang ya kani ka Meghalaya Games ha Tura ha u 2023 katwa ha u 2024 won daw pynman ha Jowai yow man leh kam ka laad wow pynyieñ pynbiang ya ki thaw yalehke kamjooh yow sñiaw yajan.
