Ki khynnah wa Pass ha ka Higer Secondary School Leaving Certificate (HSSLC) Exam 2025 wa da pynbna da ka Meghalaya Board of School Education (MBoSE) ynne ka sngi da em ki palat 80% ha waroh le tylli ki laiñ (Stream) wa kynthup ya ka Arts, Science wa Commerce. Ha ka Arts Stream da man ko 82.05%, ha ka Science Stream 82.94% katwa ha ka Commerce won 81.28%.
Ha ka Arts Stream da em hadooh 22,835 ngut kiwa yakhun ya kani ka Exam wa 18,736 ngut kiwa Pass iwa man 82.05%, heiwa da em 13 ngut kiwa mih pyrtuid ha ka Top 10.
Napyrdi ki District kiwa da lehbha ha ka Arts, ka Eastern West Khasi Hills da yoh ko 92.70% heiwa napyrdi ki 767 ngut kiwa yakhun 711 ngut da Pass ki wei da bood won sa ka East Khasi Hills kawa khur 91.18% kawa em 7939 ngut kiwa yaleh wa 7239 ngut kiwa Pass. Ha West Jaiñtia Hills kiwa yaleh da em ki 2675 ngut heiwa kiwa Pass da em ki 2279 ngut iwa man 85.20% katwa ha East Jaiñtia Hills da em 579 ngut kiwa yaleh wei kiwa Pass da em ki 522 ngut iwa dapoi 90.16%.
Ka Pass Percentage yong ka Arts Stream ha u 2024 da man ko 79.76, ha u 2023 won 80.30% wei ha u 2022 dapoi 81.17%.
Ha ka Science Stream da em 3922 ngut kiwa yakhun ya ka Exam wei kiwa Pass da em ki 3253 ngut iwa man 82.94% wa 14 ngut kiwa da mih pyrtuid ha ka Top 10.
Napyrdi ki District kiwa da lehbha ha ka Science toh ka South West Garo Hills kawa da yoh 100% heiwa waroh 33 ngut ki khynnah wa yakhun da lait lut ki, bood sa ka West Khasi Hills kawa khur 96%, katwa ka East Khasi Hills da yoh ko 86.73 % napyrdi ki 1891 ngut kiwa yakhun wei da em 1640 ngut kiwa Pass. Ha West Jaiñtia Hills da em 480 ngut kiwa yaleh wei kiwa Pass da em ki 426 ngut iwa mut dapoi 88.75% katwa ha East Jaiñtia Hills da em 26 ngut kiwa yaleh wei da Pass 25 iwa dapoi 96.15%.
Ka Pass Percentage ka Science Stream ha u snem 2024 dapoi ko 85.24%, ha u snem 2023 won 78.84% katwa ha u 2022 won 71.62%.
Ha ka Commerce Stream da em 2051 ngut kiwa yakhun ya ka Exam wa 2033 ngut kiwa Pass, iwa dapoi 81.28% wei da em 13 ngut kiwa da mih pyrtuid ha ka Top 10.
Napyrdi ki District kiwa da lehbha ha ka Commerce toh ka East Jaiñtia Hills kawa da yoh 92.45% heiwa na ki 53 ngut kiwa yakhun da em 49 ngut kiwa Pass, katwa ha East Khasi Hills napyrdi ki 1441 ngut kiwa yakhun da em 1206 ngut kiwa Pass iwa mut 83.69%, ha West Jaiñtia Hills da em 178 ngut kiwa yaleh wei kiwa Pass da em ki 152 ngut iwa man 85.39% wei na South Garo Hills ym em kiwa yakhun ha ka Commerce.
Ka Pass Percentage ka Commerce Stream ha u 2024 da man ko 80.26%, ha u 2023 won 79.31% katwa ha u 2022 won 83.63%.
Discussion about this post