Jowai: Kamwa 9 hajar ki khynnah puræ ka North Eastern Hills University kiwa da yoh kyrdan waphær waphær na kani ka skurbah ynne ka sngi da saam syrnot ya kiwa pyndep ya ki kyrdan wa da pynman, kawa man kawa 24 yong ka NEHU.
Na ki 9 hajar, 128 ngut da pyndep ki ya ka kyrdan Ph.D, 47 ngut ya ka M.Phil, 839 ha ka Post Graduate Degrees wa 7975 ngut ha ka Bachelor’s Degree.
Ya kini ki khynnah puræ da pynkup burom da u dkhot ka NITI Aayog u Dr. Vijay Kumar Saraswat ha ka yalang kawa da pynman ha NEHU ynne ka sngi.
Ha kani ka sngi da emlang leh u Vice Chancellor u Prof. SK Srivastava, u Pro-Vice Chancellor u Prof. Henry Lamin, ki khynnah puræ, ki manbei ki manpa wa kiwi kiwi.
Chwa wow sdang kani ka yalang da em i khanglaad ki khynnah puræ North Eastern Hills University Students’ Union neidaw wym ye ki bor u pynmankaam yei dawa kani ka seiñ wei hadien wa kular u Vice Chancellor wow yachem wa ki heipor 4 waje neiliang ki wa kitkaam ka NEHUSU da sangeh noh ki yei yakhih.
Discussion about this post