Ki le tylli ki Autonomous District Council yong ka Meghalaya wa kynthup ya ka KHADC, JHADC wa GHADC da paan ki Rs. 8000 klur tam na ka 16th Finance Commission neibynta ki san snem wow wan.
Hawa klam wa kiwa thoh khubor hadien i yachem wa u Chairman ka 16th Finance Commission, u Dr. Arvind Panagariya ynne ha Shillong, u CEM ka Khasi Hills Autonomous District Council (KHADC), u Pyniaid Sing Syiem da ong u wa ka KHADC da paan ko Rs. 2641.54 klur, ka Jaiñtia Hills Autonomous District Council da paan ko Rs. 1019.60 klur katwa ka Garo Hills Autonomous District Council (GHADC) da paan ko Rs. 5042.30 klur. I paan poisa waroh da poi cha ka Rs. 8877.51 klur neibynta ki san snem wow wan kiwa daw sdang nadooh u 2025 hadooh u 2029.
U Pyniaid da ong u wa da booh i kyrpaad ha ka 16th Finance Commission wow pynlait noh ya ki District Council wow lai lyngba ka Ministry of Panchayati Raj wei da toh u phah ya ki Grant lyngba ka Department of North Eastern Region (DoNER) lane ka North Eastern Council (NEC) neibhah wa ka ki District Council em ki hapoh ka Article 244 yong ka Sixth Schedule katwa ka Panchayati Raj haap ko hapoh ka 243.
Da ong leh wa da phah tyrwa cha ka Commission wow pynyinsur ya ka kyndon yong ka Untied Grant kawa e cha ki District Council neibhah wa boon ki kyndon ym yahaap katkam i long i man ha kani ka jylla.
Iwi won wa ki District Council da kyrpaad ki toh wow e yarap na ka Revenue Deficit Grant kyrpang ya ki District Council neibhah wa ki District Council da chem chitom ki nei duna ka poisa yow ye u pyndep ya ki kaam ki jaam.
U Pyniaid da ong u wa ki District Council da tyrwa ki wa ka mang poisa yow chna ya ka Town wa Village Police heiwa ka KHADC da pynkhreh ko wow thung 3000 ngut wa kynthup 1500 ki kynthai wa 1500 ngut ki chynrang.
Discussion about this post