Ka Election Commission of India kam chibynta wow yaleh u pynman ya kani ka Election MLA ha Tripura, Nagaland wa Meghalaya kawa khooid wei kawa lait na kiwon kiwon ki laad wow pynbiej bru da ka poisa kamjooh deiwa e mynkna da ki tiar ki tar, da yoh wow kem chiboon ka poisa, i kiad, drugs wa ki tiar ki tar kiwa da ku da 20 chah ya iwa yoh u kem ha ka Election MLA ha u 2018.
Ha Meghalaya ka poisa wa da yoh kem dapoi ko hadooh T. 7.36 klur, ha Tripura T. 3.44 klur katwa ha Nagaland won T. 3.25 klur kawa dapoi waroh T. 14.05 klur.
I kiad ha Meghalaya da yoh wow kem 100299 litre iwa chongdor T. 2.31 klur, ha Tripura 140693 litre wa chongdor T. 2.58 klur katwa ha Nagaland won 68879 litre wa chongdor T. 4.41 klur kiwa dapoi waroh T. 9.31 klur.
I drug na Meghalaya da yoh kem wa chongdor T. 31.21 klur, na Nagaland T. 27.78 klur katwa na Tripura won T. 26.77 klur kiwa dapoi waroh T. 85.76 klur.
Ki ksiar ki rupa wa kiwi wa mar wa kordor da yoh wow kem T. 0.91 klur ha Meghalaya, ha Tripura 3.41 klur katwa ha Nagaland won ym em kiwa dapoi waroh T. 4.32 klur i chongdor.
Ki tiar ki tar wa da saam mynkna ha Meghalaya da yoh wow kem T. 22.19 klur, ha Tripura T. 8.47 klur katwa ha Nagaland won T. 3.74 klur kiwa dapoi waroh T. 34.39 klur.
Deilang kini waroh dapoi T. 63.98 klur wa yoh kem ha Meghalaya, ha Tripura T. 44.67 klur katwa ha Nagaland won T. 39.19 klur deilang waroh ki 3 jylla dapoi T. 147.84 klur heiwa ha u 2018 dapoi waroh T. 7.24 klur kiwa da yoh kem.
Ha u 2018 ha Meghalaya waroh kini kiwa da yoh kem dapoi ki T. 1.15 klur, ha Tripura T. 1.79 klur katwa ha Nagaland won T. 4.30 klur.
