Ka Lympung yalehbol kawa tip kam ka 10th Secondary School Football Tournament da pteiñ yaka ynne ka sngi deiwa pynman ar tylli ki yalehke.
Ha ka yalehke wa nyngkong, ka One Soul Utd. (Pdengkarong) da jop ko yaka Sankhat SC da 3-0 da ki kool wa thap da u Wanbor Langshiang haka minit wa 50, u Kindness Mukhim haka minit wa 56 wa na u Monday Mukhim haka minit wa 67.
Haka yalehke wa ar won ka Thrang Chynnam FC da jop ko yaka DS (Demthring) da 2-1.
Ya ka kool yong ka DS (Demthring) da thap bakla da u Nihkynmu Suting (Own Goal) haka minit wa 27, katwa ya ki kool ka Thrang Chynnam FC won da thap da u Puson Rymbui haka minit wa 62 wa na u Jeffry Surong haka minit wa 71.
Ki yalehke ha ka 10 tarik won u pynman ar tylli kiwa daw sdang da ka Surong Bro’s pyrchah yaka Amlanai YB heipor 12:00 waje pyrdi sngi wei daw pynbood da ka Rymbai Shkenshynriah SC pyrchah yaka War West United FC heipor 2:00 waje i sngi.
Discussion about this post