Ynne ka sngi ka West Jaiñtia Hills District Taekwondo Association (WJHDTA) da pdiang sñiawbha ko ya u khynroo Honda O Hi Papang uwa ba ka chnong Shangpung Pohchnong.
U Honda da wanrah burom u ya ka jylla Meghalaya ha ka lympung 2nd North East Olympic Games 2022 deiwa yoh ya ka takma tama ha ka yalehke Taekwondo ha ka Under 80 Kg Senior heiwa hapoh ka District da chah jied samen donhi u.
Hei pdiang burom da yoh i klam wa tbian na uwa e buit ya ka Association, u Richardson Rabon heiwa da e mynsien u ya kiwi tawon wow chimbynta ha kani ka jait yalehke kamjooh ya uni u khynroo wow man u uwa dang kreh chitom ha ki por wa daw wan.
Neiliang u Coach u Chibaitmi Langstang da ong u wa ini toh iwa sdang donhi wei da pynchlur u ya kiwi ki khynnah wow dang kreh chitom chooh chooh ki khnang wow yoh ki yei jooh i burom.
Heijooh i por u Chibaitmi Langstang da yoh u wow chimbynta kam u Referee ha kani ka lympung wa heh hapoh ka thaaiñ North East.
