Shillong: Ka Confederation of Meghalaya Social Organisation (CoMSO) ynne ka sngi da pynbna ko wow pteiñ i yakhih hadooh wow yoh ya ka Inner Line Permit (ILP), wot hadien wa ka sorkar jylla da pynbna ko wow chim lang da kawi ka rai ha ka yung dorbar wow dawa ya ka ILP na ka sorkar India.
Hawa klam wa ki laad pathai khubor, u Chairman ka CoMSO, u Robertjune Kharjahrin da ong u wa ka seiñ u yieñ bait ko ha ka jooh ka yurim katwa ym pu pynkrehkaam yaka ILP ha ka jylla, ka yakhih u pteiñ ko neini chakhmat wei daw pynbna kawi hadien kawi, katwa myntu ka sngi daw pynman da ka yalang ha Mawlai Nongkwar, Petrol Pump.
U Kharjahrin da ong u wa ka CoMSO ka pdiang sñiawbha ko yaka rai yong ka sorkar wow lum ya ka dorbar kyrpang ha ka tayaw wow wan yow dawa ILP da iwi i sur.
Uwa yahkhmat ka CoMSO da dawa u leh na waroh 60 ngut ki MLA ka Meghalaya wa ym toh wow klam da kamwi won pyrchah ya ka ILP, khamtam uwa yahkhmat ka liang pyrchah, u Dr. Mukul Sangma wa ym klam kyllaiñ chooh hajrong ka ILP næ wow yalehke ya i sñiaw ki paidbah.
Da ong u wa lada em ki MLA kiwa dang klam kyllaiñ hajrong ka ILP, neiliang ka CoMSO daw pynman ko yaka yakhih pyrchah ya kitæ ki MLA, wei toh u kyrchaan bait ha kani ka por, neibhah ki paidbah da yooluti ki wa ka Meghalaya da iwi i sur lyngba ki 60 ngut ki MLA wow yoh ya ka ILP.
U Kharjahrin da ong u wa katni da toh i por wow yatylli deiwa kyntu ya waroh ki para ri wow ya tylli ha kam kani ka por. Ha i jooh i por da wer u wei kyntu u leh ya kiwi de ki seiñbhalang wow ya krehkang deiwa mylliñ noh ya iyi wa da dep neibhah wa ki paidbah ki yooluti ki yaka ya tylli neibhah lada ym ya tylli katni daw man biej ko yaka jaitbru.
Discussion about this post