Ka North East Congress Coordination Committee (NECCC) da e khublei ko ya kiwa chong chnong ka Karnataka kiwa da pynrem deiwa toh rukom ya ka BJP kawa da phiah ya ka ri hapoh i yahkhmat u Prime Minister ka ri.
Ka NECCC da yaroh ko leh ya ki bru ka Karnataka kiwa da ye wow pyndooh noh yei synchaar ka BJP kawa da joor ki kaam baamtooh neibhah ka Congress da psiah ko wow yaleh Election deiwa pyrkhat yei eh i khoo ki bru paidbah, kiwa dooh wa duk, ki wym em khih em khan pyrchah yei ku dor ki mar ki mata iwa da ktah yeiwa ye ki bru u im.
Neiliang u Diganta Chaudhury, General Secretary ka NECCC da ong u wa ka “Double Engine” ka sorkar BJP toh deiwa chaniah hei bor poisa wei wow pynyaphær jaitbru wei da ini i pynjop ki paidbah ka Karnataka pynyoo ki wa pdiang ki yei rukom synchaar wa em dei maya heithaw wow em deiwa pynyachoon yow wanrah yei imsuk hapoh ka imlang sahlang kamjooh yow roi u paar.
Ka North East Congress Coordination Committee da e khublei ko leh ya u President warim ka Party, u Rahul Gandhi uwa da pynman ya ka “Bharat Jodo Yatra” yow sdang u thung ya ki symbe wow maya uwi ya uwi heithaw wow choon uwi ya uwi yow man chngaaiñ ka imlang sahlang yow pynku ya ka ri chakhmat.
Da e khublei leh ya u Congress President, u Mallikarjun Kharge wa waroh kiwa yahkhmat ka KPCC kiwa da kreh chitom wow lai yalap Election yow pynyoh ya ini i jop wa emburom.
Kamtæ da kyrmen wa u PM Narendra Modi wa u Home Minister, u Amit Shah u bood ki ya ka “Raj Dharma” wow pynlut por ki yow wanrah yei suk i saaiñ hapoh ka Manipur deiwa pynbait ya waroh iwa da bakla nachwa wow pynphiah ya ka jylla Manipur.
