Hadien wa mih ki pynbaad wa em i leh chiliang ha ka Exam Meghalaya Civil Services (Prelims) wa pynman da ka Meghalaya Public Service Commission (MPSC) deiwa pynbna ko sa 62 ngut kiwa ye u yaleh ya ka MCS (Mains) Exams najrong kiwa da dep pynban chwa.
Da pynche wa waroh iwa da leh hawa pynman ya kani ka Exam Meghalaya Civil Services (MCS) da leh deiwa khooid khlem da pynlait tooh iyi iyi wei kamwa man ha kiwa boon ki Exam, da e laad leh ya kiwa yaleh Exam wow ujor ki lada chem ki wa em iwa bakla ha ki yukylli wei kamjooh ki jubab (Questions/Answers).
Da ong leh wa da leh katwa ye wow pyntikna wym em i bakla nadooh kiwa chna ya ki thup yukylli (Question Setter/Examiner) tangwa wot hapyrdi ini waroh dang em ki por wa em i bakla.
Da pyntip wa hadien wa da pynbna ya ka Result ka MCS Preliminary Examination, da yoh ya kawi ka ujor wa da booh ha ka MPSC haka 25-01-24 deiwa paan ya ki Answer Key kani ka Exam heiwa da e ya ka Answer Key ha ka 06-02-24.
Hadien ini uwa ujor da lai pynyoo u cha ka MPSC wa i jubab ya 3 tylli ki yukylli toh kiwa bakla katkam wa da pynyoo ha ka Answer Key deiwa pynyoo leh ki sabut yow pynsakhiat yeini.
Kamtæ da pynman ya ka Internal Review wei da phah leh yow pynsakhiat yeini heiwa da chem wa toh hi katkam wa da ujor wa ka Answer Key da jied ko yei jubab wa bakla neibynta ki le tylli ki yukylli (Questions).
Kini ki 3 tylli ki Questions toh kiwa mar 2 Marks iwi iwa mut waroh le dapoi 6 Marks, kamtæ da chim yukheiñ deiwi yei Marks, wei i bakla toh du neibynta kini ki le tylli katwa kiwi toh kiwa biang hi.
Da pynbna leh wa ki Cut Off Marks ha kani ka MCS Preliminary Examination wa da pynbna ha ka 15-12-23 man ko kamni:
Un-Reserved- 112 Marks
Garo- 84 Marks
Khasi-Jaiñtia- 92 Marks
OST/SC-86 Marks
Kamtæ deiwa kheiñ ya ki Marks deiwi, da chem wa da em sa 62 ngut kiwa da yoh u psiah yow yaleh ya ka MCS (Mains) Exam najrong kiwa da dep pynbna wei da rai wow e laad leh ya kini neidaw wa em i bakla neiliang ka MPSC.
Da pynkut deiwa ong wa yow man salonsar, ym em yarap du ya uwa ujor tangwa da kheiñ deiwi ya ki Marks yong ki 13,451 ngut kiwa yaleh kani ka Exam neibynta kini ki le tylli ki Question heiwa da chem wa da em sa 62 ngut kiwa poi cha ka Cut Off Marks najrong ki 580 ngut kiwa da pynbna nyngkong wei ini pynyoo ko wym em i leh chiliang ya kiwon kiwon wei i chah pynbaad toh kiwa khlem yurim.
Discussion about this post