Jowai: Ynne ka sngi ha Thomas Jones College kamwa 50 ngut naki 70 ngut da wan ia chim bynta ki ha ka Orientation Programme kawa da pyllai da u ma G.M. Bruce u Chief Instructor iong ka North Eastern Career Academy kawa na Shillong.
Ha kani ia ialang da emlang u Principal ka Thomas Jones College u Dr R.R. Kharkongor, u I. Phawa R.A. ka Planning, wa u bah D.P Kharsati ADC.
U Principal ka Thomas Jones College da kyrsu kyntu u ia ki khynnah wow ia leh ki u wan tista cha kani ka e-sikai kawa daw sdang ki nadooh mynstep ka sngi hei por 10:15 istep hadooh 3:00 jenmiet, nadooh ka sngi nyngkong hadooh ka sngi thohdieñ ka wow man ar bnai lynter.
U D.P. Kharsati kam u kongsan ynne ka sngi da ong u wa ki khynnah toh u pyn mlien ki u puræ ia ki jait kot waphær waphær ki wow pynproh yei thij i pyrkhat iong ki dæ. Ban joor haroh u wa ki khynnah toh u chim ki leh ia ka kabu u pynemkaam ia ki computer kamjooh wa kiwi tawa ki buit iong ka information technology.
U G.M Bruce Chief Instructor da ong u wa ha pyrdi i sikai daw em haroh ka eksamin arsien. Kawi toh dang ha chitieñ ka course kawi won toh hadien da dep ia ka cource. Daw sikai haroh ia ki khynnah ia ki buit ki budia ha ki por wow lai interview ia leh kreh ki. Ong u leh wa hadien kani ka sikai yoo luti u wa ki khynnah daw man ki kiwa jop kam ha ki exam wa pyllai daka Staff Selection Commission (SSC), District Selection Committee (DSC), examin iong ki bank, waki examin kompany inchuran.
Ha kini ki ar bnai, ki khynnah daw ioh ki chiboon ki jingsikai hei iatoh ha kiwa boonjait ki phang, kam ka General Intelligence and Reasoning, English Language, General Awareness, Quantitative Aptitude, Mathematics, Computer Knowledge, wa kiwi kiwi.
Ya kani ka e-sikai da bah khlieh da ka District Administration hapoh ka skim Chief Minister Career Guidance Scheme.
Discussion about this post