Jowai : Kam chibynta wow yada ya ka Wah Myntdu uwi u bru uwa tip kam u Sajay Laloo dei mynsien wa khia da ujor u cha ka NGT pyrchah ya ka sorkar Meghalaya, ka Meghalaya State Pollution Control Board, u PCCF, DFO ka West Jaiñtia Hills, ka Jowai Municipal Board wa kiwi kiwi.
Ha ka dorkhat ujor cha ka NGT, u Sajay da ong u wa ka wah Myntdu kat dang lai ki snem dang joor i jakhlia wei man bih ko na ki daw wa boon nadooh i chna yung chna sem harood ka wah, i noh khyndaw ka PWD hawa chna sarok cha ka wah iwa da pyndap ya ka hadooh i chna pynmiat ya ka Syntu Ksiar da ka tnat Soil and Water Conservation iwa da ktah ya ki thaw chong ki um ki doh.
Da ong u leh wa ka tnat Tourism kawa da riñ ya kiwa uiñ sawari wow hiar ki cha kani ka wah tangwa man hi-eh ko kawa pyntngit ya ka na ki baamdoh, ki baam sñiawbha, wei ka tnat Exise Department leh emkaam u yada ko ya ki rood ka wah kiwa dap du ki klong kiad kiwa noh ki bru.
Heijooh i por da kam wa ka Municipal Board da chah ko wow noh taroi wei wow pynkai jakhlia ki paidbah cha ki dooid ki liar kiwa kai cha kani ka wah wei ki ar tylli ki hospital leh ym em u chimkhia ki wow pynkhooid ya ki tngit ki jakhlia wa mih na ki kiwa kai cha kani ka wah.
Khaddooh da ong ha ka dorkhat wa i tih moo tih chiap kamjooh leh i noh ya ki blai Hindu da pyndap wei pynjakhlia ki ya kani ka wah.
Neiliang u Sajay Laloo da kyntu u na ka NGT wow hukum ya ka sorkar kamjooh ki tnat sorkar wow kyrriah wei wow pynsangeh ya kiwa chna yung chajan ka wah, wow hukum wa 1 km pyn ar liang ka wah wow man ko kam ka Green Zone, wow phah sangeh ya waroh i jait tih moo tih chiap hajan ka wah, wei wow mana wym hoi u noh khyndaw næ jakhlia hajan yong ka wa kiwi kiwi.
Ya kani ka ujor ka NGT da pdiang ko ya ka ynne ka sngi wei da phah ko ya ka cha ka tnat ka NGT wa em ha Kolkatta Circuit Bench heiwa da chong bichaar wei daw e hukum ya ka ha kani ka tayaw wow wan.
Discussion about this post