Khliehriat: Ka seiñ SBYWA Elaka- Rymbai & Lakadong, EJHD ha ka CEC kawa man ynne ka sngi da pdiang ko ya ki dkhot thymme ha Open Hotel Ladrymbai wei kini ki dkhot kynthup ki ya u I. Rymbai, (Lama), u John Pala wa u D. Suchiang (Borgkhat) heiwa da thung leh ya u J. Pala kam u Publicity Secretary wei ya u Itbhamiki Rymbai kam Executive Member yong ka CEC.
Ya kini ki dkhot thymme da pnskem wei pynkhlai ya ki kyntien kular ha ka yalang da u S. Shdap President ka seiñ ryngkat i emlang u N.L. Talang, Genl. Secretary; u E. Suchen, Education Secretary; u E. Lamare, Chief Adviser wa ki dkhot yong ka seiñ.
Neiliang yong u Genl. Secretary da pynche u ya ki thong krehkaam ka seiñ ryngkat ki kyntien sneiñ kyntu ya kini ki dkhot thymme wow em yei naam i warom lada em ki ha kawon kawon ka seiñ.
Ynne ka sngi chwa wow sdang ka yalang da em i suki kam dak wow kynmo warom ya u khlawait ka Ri Pnar, u Woh Kiang Nangbah uwa yaleh pyrchah ya ka sorkar pharæng ha ki snem 1862.
Chooh chooh ha kani ka yalang ka seiñ da pynbait ko wow lai chakhmat heiyatoh wa i emkaam ka Bataw PHC, wow dawa u chna ya u sarok RBBJS-RBBD neibynta u suk i lai i wan ki paidbah wei wow pyndep ya ki kaam wa dang sah yong ka seiñ kam i saam Award hapoh ka thaaiñ.
Heijooh i por ka seiñ da maham ko ya kiwon kiwon ki bru kiwa chim kabu deiwa pynboodnam yei pyrtuid ka seiñ.
Discussion about this post