Jowai: Ka Seiñ Kur Sutnga 14 Khrong Khasi Jaiñtia haka dorbar pyllun wa da pynman ynne ka sngi ha madan Jrisaleiñ, Jowai da pynbna paidbah ko wa da pdiang yaka Kur Shadap Passah kam ka kur hapoh ka thup yong ka kur Sutnga 14 Khrong.
Hei sakhiat hi ka Kur Shadap Passah da em chwa ko hapoh ka thup yong ka Seiñ Kur Sutnga 14 Khrong wa kynthup ya 14 tylli ki jait kur wa yaman chikur kam ka kur Sutnga, Pajuh, Pakem, Muliar, Shadap Sutnga, Patlong, Salahe, Saioo, Law, Partuh Shangpung, Shadap Passah, Pasleiñ Sutnga, Shdui waka kur Syiemlieh. Tangwa neidaw wa em i thut ha ki snem wa da dep hei yatoh waka kur Shadap Passah kamtæ neiliang ka Executive Committee hapoh i yahkhmat u President u Bankupar Sutnga hadien wada lai luti ki wow thooh yei sakhiat yong i yatoh kur, kamtæ ynne ka sngi da pynbna paidbah wei da pynskhem yei ya man chikur waki Shadap Passah.
Kawa kam kani ka dorbar yachemlang ka kur Sutnga 14 Khrong da jooh pynman khlieh u snem kam chibynta wow ya tipmit para kur, kamjooh wow yoh i sneiñ i kroo naki waheh wasiañ neibynta i bha i miat ka mynried ka mankawi ka kur kamjooh ka imlang sahlang. Heijooh i por wow lait nei ya chongkha khleh.
Ha kani ka yachemlang u S.S.Syiemlieh ADC East Jaiñtia Hills District da man u kam u kongsan wei hawa e yei klam pynsñiaw u i kmen wow yoh u emlang ha kam kani ka sngi wa kyrpang ka kur kawa man leh chibynta u pynkhlan i yatoh song chikur wei kamjooh leh u khanglad yei thmu kiwi won ki jaitbru wow kam yaka kur ka jait.
Chwa ini da yoh i pynsñiaw yaka bui (Report) yong ka kur, ki kaam wa sahteiñ, i yachem yumut wa kiwi kiwi, nalor wada yoh i klam na u Baklan Pajuh, u Erwin Sutnga, u Hunmon Sutnga, i duwai na u Rev. Happy Sutnga wa kiwi.
Neitæ da pynchongchit ya kani ka sngi dei chaad i rwai naki khon yong ka kur.
Discussion about this post