Jowai: Ynne ka sngi ka da chong yalang ka dhab ki montri (Cabinet Meeting) ka sorkar jylla ha Shillong wow yaklam ya ki kattu katni ki phang wa yatoh wa ka jylla.
Hawa yaklam wa kiwa pathai khubor hadien ka yalang, u Symbood Montri Rangbah ka jylla, u Prestone Tynsong da ong u wa da pyntip u wa da pdiang ya ka Final Draft yong ka Meghalaya State Education Policy ka jylla namo ki kyndon krehkaam hei yatoh wa i puræ puthi.
Hajrong ini neiliang u montri ka tnat puræ puthi, u Lahkmen Rymbui da e khublei u ya waroh kiwa embynta wow pachat ya ki yumut hajrong kani ka Policy wei da pdiang noh ya ka ynne ka sngi.
U Prestone da pynrap u deiwa ong wa dap u dei kmen wow pdiang ya kani ka Final Draft yong kani ka Policy deiwa pynrap wa ym emkaam wow wanrah ya ka ha ka yung krehkaam neibhah wa man ko du kam ka rukom krehkaam.
U Lahkmen da ong chooh chooh u wa ya kani ka Draft nyngkong da pynchong yurim hajrong ka Comprehensive Analysis of the Education Sector in the State wei da chong pyrkhat hajrong ini wa kiwa boon ki bru wa chemphang.
Chwa wow chim ka rai wa khaddooh da ap ya ka Committee wa 24 ngut ha u Wisu (March) 2018 heiwa da ap da sñiaw ya iwa pachat da kiwa sikai wa katni wa kiwa da chong-ngiah wa kiwi kiwi.
Ka yalang wa nyngkong yong kani ka Committee da pynman ha ka 15 Naisan uni u snem wei da yoh ya ar spah lephaw tam tylli ki yumut na ki bru chemphang hajrong kani ka Policy.
Kani ka kyndon krehkaam kynthup ko ya ka waroh ki kyrdan esikai hapoh ka jylla nadooh i por khynnah hadooh kiwa esikai, ha ki bynta waphær waphær.
Yei phi Download ya kani ka Final Draft Meghalaya State Education Policy deiwa Click heini ha wah
Discussion about this post