Dei sñiawsarong wa i kmen wa khroo, ka seiñ ki warep ka Hill’s Farmer Union, West Jaiñtia Hills District da pdiang sñiawbha ki ya Trinity Saioo ka warep kawa da yoh pdiang ya ka khusnaam wa heh tam ha ka ri (Padma Shree Award) na u President ka ri India u Ram Nath Kovind ha Nongbah Delhi. Kam wow pynkynmoo, ka Trinity Saioo da yoh ko ya kani ka khusnaam neidaw wa ye ko wow pynchlur ya ki warep wow pynpawnaam ya u chyrmit Lakadong.
Ha kani ka 10 tarik wa dep, ka Trinity Sayoo da liwan ko cha yung heiwa kiwa yahkhmat ka HFU West Jaiñtia Hills District deilang wa ki warep da lai pdiang sñiawbha ki nadooh i bynta wa psiah cha West Jaiñtia Hills District ha lait ka chnong Mookyndur, West Jaiñtia Hills.
Hanla i por da miet i, ki warep da pdiang sñiawbha ki ya ka Trinity Saioo deiwa pynman leh ya ka yalang wa tbian heiwa da yoh leh yei klam wei e khublei na ka Trinity Saioo kawa da e mynsien leh ya ki warep wow kreh chitom wei wow man kiwa ya tylli.
Ki dkhot ka seiñ kiwa da ya emlang toh u Mutshwa Thabah (President), u Mosses Suting (V-President), u Chanbor Rymbai (Secretary), u Supplyme Sari (Organizing Secretary), ki Executive Member, ki President wa Secretary na ki Unit waphær waphær ka Thadlaskein Block wa ki warep.
Da synraan ya Trinity Saioo wow lai chim ya ka khunsnaam na nongbah Delhi da u Allfondbirth Kharsyntiew (General HFU Secy. Seiñbei) wa u Demanson Lyngdoh Project Officer yong ka Lakadong Mission deilang wa kiwa hayung hasem.
