U President ka Voice of the People Party (VPP) uwa man leh u MLA na Nongkrem, u Ardent Miller Basaiawmoit da pynsñiaw u wa lada pynsangeh bait ya i thung kreh daw ktah ko ya ki khynroo wa thooh kreh, da pynrap u deiwa ong wa boi ini i daw wa ka sorkar da pynkylla noh ko ya ka Office Memorandum (OM) yong u snem 2022.
Da pynsñiaw u yei ngait skem wa da ini i pynkylla ya ka Office Memorandum, i thung kreh ym man de ko kam ha chisnem wa dadep heiwa kiwa thooh kreh yachem ki ya i leh chiliang.
U Ardent uwa em leh ha ka Liang Pyrchah ha ka jylla da ong u wa kam ka Party ym kwah ko wow pyrkhat bait yeiwa sih, wei da pynsñiaw leh wa ha i jooh i por wa ngait u wa ka sorkar daw leh ko yeiwa biang.
Chooh chooh da ong u leh wa neiliang ka VPP da pynsñiaw ko wow pynsageh chwa yei thung kreh wei ka sorkar leh da ap ko, tangwa u pynsangeh bait ya i thung kreh ymtoh iwa suksuk, heiwa da pynsñiaw u wa ka OM kawa thymme daw pynbait ya i eh i khor wa da mih ha ki chi snem ar snem wa da lai.
Ka sorkar jylla da rai ko wow lai chaphrang heiyatoh wa i thung kreh hadien wa dep wow pynkylla namo Amend ya ka Office Memorandum yong u snem 2022 yong i pynkrehkaam ya ka Reservation Roster, wei katkam wa ong u Montri Rangbah, u Conrad Kongal Sangma wa i pynkylla ya ka Office Memorandum man ko katkam wa e yumut wa da chim na ka yalang yong waroh ki seiñ saiñ pyrthai kiwa da yachem hapoh ka Committee yong ka Reservation Roster wa Reservation Policy.
