Kam chibynta yong i lehwarom Swarnim Vijay Varsh namo i lehkmen dap 50 snem wa jop ka India ya ka Pakistan ha ka thma 1971(thma Bangla), ya ka Swarnim Vijay Mashaal da wan pdiang ya ka da u montri rangbah ka jylla, u Conrad Sangma ha Madan Polo, Shillong ynne ka 29 tarik.
Kani ka Mashaal namo ka tadongmusa ya kawa da wanrah na National War Memorial, New Delhi ha ka 16 Kmaichonglad 2020, da poi ko ha Meghalaya ha ka 27 tarik.
Wow kynmoo warom ya ki chipai ka ri ha kani ka thma 1971 wa i pynlaitlooid ya ka Bangladesh, da pynman ya ka lehkmen ha Madan Polo. Shillong.
Ha kani ka sngi da emlang ki sahep ka sorkar jylla, ki sahep chipaiu, pulit wa ki chipai wa da chongngiah.
Hawa e yei klam u Conrad da ong u wa kam ka ri emkaam wow burom ya ki chipai kiwa da kreh neibynta yong ka deiwa kyntu ya ki khynroo wow em i bahkhlieh wow pynneh u chakri ya ka ri.
