Ka sorkar Meghalaya Democratic Alliance (MDA) da pyndep ko 4 snem i lai luti wow yahkhmat ya ka jylla. Ya ka sorkar MDA da chna ha ka 6 tarik u Wisu 2018 ya kawa da yahkhmat da ka NPP wei da synrop da waroh ki seiñ saiñpyrthai wa ki MLA samen, lait noh ki MLA yong ka seiñ Congress ha itai i por kiwa da hap wow chong hapoh ka Liang Pyrchah.
Hawa klam cha ki laad pathai khubor hadien ka lehkmen wa da pynman ha Soso Tham Auditorium, u Montri Rangbah ka jylla, u Conrad Kongal Sangma da ong u wa ka sorkar MDA da chem ko ya kiwa boon ki eh, khamtam i wan ban ka khlam COVID-19 ha waroh kawi ka pyrthai. Da ong u wa hanla hapyrdi i eh, ka sorkar da ye ko wow leh ya kiwa boon kiyi kiyi.
Hawa yatoh wa i wym ye u wanrah ya ki Medical College, da ong u wa em boon i eh yow pynmankaam ya ki Medical College ha Shillong wa Tura neibhah wym ye u krehkaam ki Contractor, ya iwa katni ka sorkar da rai ko wow pyndam noh chwa ya ka Contract wei wow sdang thymme biang ya ka Shillong Medical College, katwa ya ka Tura Medical College da ong u wa i kaam da lai tangwa suki i neibhah wym biang iwa emkaam wa u sarok.
Hawa toh won wa i pynbaad pyrchah ya ka sorkar hajrong ki kaam baam-tooh, neiliang u Montri Rangbah da ong u wa lada ki krehkaam yong ka sorkar ym man kawa che ym thung hi leh ya ki kynhun takit hawa em i chah pynbaad.
