Du ar sngi chwa wow sdang ka thap Vote Election MLA ha jylla Manipur, da em i pdung Bomb ha iwi i yung wa em hapoh ka Churachanpur District ynnin i miet ka 28 tarik heiwa da yap ar ngut wa kynthup ya iwi i khynnah wei da mynsoo 5 ngut.
Ini da jia i hapoh ka chnong Gangpumul wei da suba wa uni u Bomb toh uwa dei siat (Mortar).
Ha ini wa jia da mynsoo 7 ngut heiwa da kit ya ki cha ka Hospital wa em ha Mangminlal heiwa i khynnah wa dang 6 snem wa u bru wa 22 snem da khlaad noh ki.
Ki pulit hadien wa poi ha ini i thaw da sdang ki wow thooh ya kiwi emkti.
Ini toh i sien wa ar wa pdung Bomb ha Manipur nadooh wa da pynbna pynman Election heiwa ka thap Vote u sdang ko mynstep ka 28 wei ya ka Vote daw niaw haka 10 tarik.
Ynnin hi i miet, u kyrtong MLA naka Kshetriago, u Wahengbam Rojit da chah siat u heipor wa liwan u cha yung heipor kamwa 11:30 i miet wei da pynkit ya oo cha Raj Medicity ICU.
U Rojit toh u kyrtong ka Janata Dal (United).
Kam wow pynkynmoo leh wa ha ka 18 tarik uni u bnai, u pa u kyrtong ka NPP, u L. Sanjoy Singh leh da dep chah siat u heipor wa lai yalap Election.
