U loomdiñ wa em hapoh ka ri Indonesia ha East Nusa Tenggara da pdung u ynne ka sngi wei da khlai tdem u wa i tpai cha suiñ hadooh 4 Km iwa da pynbor yaki 2,700 ngut kiwa chong chnong wow yut chnong ki.
Ha Indonesia da em aw jan dap 130 tylli ki Volcano kiwa dang im iwa boon dooh na waroh ki ri kiwa pynyoo yaki dak ki chin wow pdung tangwa da chimpor da ki tayaw waki bnai chwa wow pdung.
U Raditya Jati uwa e ktien ka Disaster Mitigation Agency ka ri da ong u uni u loomdiñ wa tip kam u Mt. Ile Lewotolok Volcano em u kamwa 2,600 Km naka nongbah ka Indonesia ka Jakarta, wei da em kamwa 2,780 ngut kiwa chong chnong ki 26 tylli ki chnong wa khian da yut chnong ki wei ym em i dooh yei mynsien.
U Muhammad Ilham (17 snem) uwa sakhi yei pdung uni u loom da khana u wa ki paidbah da sier mynsien ki wei da thooh thaw rieh wei toh leh kiwa emkaam poisa.
Ka Volcanology and Geological Hazard Mitigation Center ka Indonesia haka Website yong ka da ong ko ye wow mih ki lyoh wa iñ, i diñ wa kai wa ka la-ær bih na uni u loomdiñ.
U Kasbani, u khlieh kani ka Center da pyntip u wa da booh yei maa uni u Volcano ha iwa 3 heiwa iwa 4 toh iwa maa dooh.
Da pyntip u leh wa em 3 tylli ki Volcano kiwa da poi hadooh i maa wa 4 wa kynthup ya u Merapi Volcano wa em ha Java wa u Sinabung, Sumatra uwa da dep pdung ha uni u bnai.
