Ka High Court ka Meghalaya ynne da pynmih hukum ko wow booh chwa cha rood ya ka hukum wa da pynmih da ka yung bichaar ka District Session Judge West Jaiñtia Hills wow phah kset chi rta ya u Nidamon Chullet kawa da pynmih haka 19-01-22 heiyatoh wa ki kaam pynyap bru wa da jia ha u Thohlakhmi (Feb) 2008.
Ka High Court da phah ko wow pynman deiwi yei bichaar nadooh wa sdang kawa toh u pyndep hapoh 8 tayaw.
Ya kani ka hukum da pynmih ka High Court hadien wa da sñiaw hun ko wa ym em biang i bichaar ya u Nidamon heiwa ym tip tikna ya ka tarik wa jia ya uwa chah tynyaap uwa da chem hakhmat ka yung krehkaam u DC ha Jowai, ym tip leh deiwa tikna ynnu wei uyi wa ujor nyngkong yaka FIR heiwa u payu uwa khlaad da ong u wa toh oo wa e FIR nyngkong tangwa uwi won u Investigating Officer da ong u wa toh ka diah kynthai wa da ujor ya ka FIR.
Kiwa sakhi wa yoo ya ini wa jia, uwi da ong u wa da jia i hka 09-02-2008 katwa uwi won ym em khana tarik u.
Ka High Court da kdaw ko leh wa ki kot ki sla wa da pynekaam kam ki sabut toh du ka FIR wa da e haka 10-02-2008, ka Post-Mortem Report wa da em tarik 10-02-2008, ki tiar ki taar wa da yoh kem; wei ym em de kiwi de. Tangwa da rai pynrem da iwa khana kiwa sakhi hapoh ka Section 164 ka Code of Criminal Procedure, 1973.
Neiliang ki muktiar u Nidamon da ong ki wa waroh kini ki kot ki sla ym yoh ki wow pait yow e yei jubab wei wow pynche kamjooh wow yasaaid iwa da mynjur leh da ka High Court wa emkaam wow bood ya ki kyndon.
Ka High Court da kdaw ko leh yei khana uwi na kiwa sakhi uwa ym em ye u pynsakhiat iyi iyi leh yei emkti u Nidamon.
Kamtæ ka High Court da ong ko wa em boon kiwa lai lait wei ym em de biang i rukom bichaar wei da pynmih hukum wow booh chwa charood yaka hukum wow phah kset kawa da pynmih haka 19-01-22 wei wow pynman biang yei bichaar namo ka Retrial nadooh wa sdang wei wow e kti leh ya ki kot ki sla cha ki muktiar u Nidamon hapoh ar tayaw.
Ya waroh i pynngat kyndon namo ki Charges toh u leh deiwi hapoh chi tayaw wei i bichaar toh u sdang chi tayaw hadien; wei i e sabut kiwa sakhi leh toh u pyndep hapoh ar tayaw wei hadien wa pyndep ya kini waroh, u Nidamon da ye u wow yaleh yow yoh Jamin hapoh ki kyndon wa booh da ka yung bichaar wa bichaar ya oo.
Ya kani ka bichaar thymme toh u pyndep hapoh 8 tayaw.
