Ka kynhun na Mawlai hapoh ka ‘Ka Sur Ki Nong Mawlai’ ynne ka sngi da lai ki wow ekti da ka chithi cha ki 35 ngut ki MLA ka ri Khasi wa Jaiñtia wow paan yei kyrchaan wa pura hajrong i dawa wow pyndam kreh noh chipor ya ki heh pulit kiwa yahkhmat wow chim yei mynsien u Cherish Thangkhiew ha ka 13 tarik uni u bnai.
Kiwa yahkhmat kani ka kynhun na Mawlai ynnne ka sngi da yoh ki wow ekti markhat ya katai ka chithi ha ki MLA wa kynthup ya u Process T Sawkmie, u Adelbert Nongrum, u Mohendro Rapsang, u Alexander L Hek, u Banteidor Lyngdoh, u Hamletson Dohling, u Renikton Lyngdoh Tongkhar, u Pius Marwein, u Sanbor Shullai, u Brolding Nongsiej, u Lambor Malngiang, u Gigur Myrthong, u George B Lyngdoh wa u Kimfa S Marbaniang.
U Donboklang Kharlyngdoh uwi na kiwa yahkhmat ‘Ka Sur Ki Nong Mawlai’, da ong u wa ym ye wow len wa kani ka sorkar kawa da pdiang sñiawbha ya u Cherish Thangkhiew ha i por wa u uiñ u cha i im wa thymme, wei ka sorkar leh jooh khut ko barabor ya ki seiñ kieñ suloi wow uiñ biang ki, tangwa da ini i jia ya u Thangkhiew da mih i kylli, lada i khut yong ka sorkar man ko kamwa khublei da ka timun wei tynrah da ka tidiang.
Da pyntip u wa neiliang ki MLA kiwa em ha ka liang pyrchah da pynsñiaw ki wow chimkhia ya ini i dawa wow rah yaklam hapoh ka Yung Dorbar Chna Aiñ kawa daw pynman. Da ong u wa ya kani ka kaam kawa khian daw man ko i sarom ya ka sorkar wow rah hapoh ka Yung Dorbar, wei da pynsñiaw u yei kyrmen wa daw chimkhia wei mynjur ya i dawa yong ‘Ka Sur Ki Nong Mawlai’ deiwa tuklar lang yong ki MLA.
Neiliang u Marbud Dkhar da ong u wa ka kynhun ym em ko iwon iwon i pyrchah næ khang ya ki pulit hawa emkaam ha ka chnong Mawlai, khamtam wa ki skur u sdang noh ki nadooh mynstep ka sngi khnang wow em i lai bait lai ryntih ha ka chnong Mawlai waroh kawi.
