Jowai: Hadien wa kiwa chong chnong ka Ummulong West Jaiñtia Hills da ujor ki ha u Naichiphaw ha u CEM ka JHADC u Andrew Shullai pyrchah ya u Waheh Chnong yong ki u Shellsing Langi hajrong kiwa boon ki kaam pyrchah ya oo heiwa ini i awri awra da neh ki da rap slem kattu, kamtæ neiliang u CEM ynne ka 7 tarik da khut hajir u ya kiwa ujor ka chnong Ummulong, u Waheh Chnong hakhmat ka Executive Committee yow pynsñiaw ki jar jiar i sur wei wow wanrah deilang ki kot ki sla pynsakhiat yeini.
Ha kani ka jooh ka sngi da khut leh ya u Dolloi ka Elaka Jowai kamwa oo leh da dep pynsñiaw u cha ka Executive Committee hei yatoh wa kani ka jooh ka kaam neibhah kiwa chong chnong ka Ummulong leh da dep ujor ki cha u Dolloi.
Hei yaklam wa u CEM hadien wa dadep chong yalang da ong u i daw wa khut u ki ha kani ka sngi toh wa kwah ki u ap yeiwa pynsñiaw na waroh ar liang kamjooh na u Dolloi ym u ap du i sur chiliang. Neitæ da khana u wa ha kani ka sngi da pynsñiaw da yaklam leh wa u Waheh Chnong hajrong i tyngkheiñ u ya ka hukum ka Council kawa da phah ya oo.
Hajrong ini waroh, da pyntip u wa ka Council daw chong bichaar bniah ko katkam wa man yeiwa da klam da ong kiwa ujor, uwa chah ujor wa u Dolloi wei ka Executive Committee daw chim ko yaka rai wa biang tam khang yow wanrah i chongsuk chongsaiñ hapoh ka chnong Ummulong.
Hawa yaklam wa kiwa pathai khubor neiliang u Waheh Chnong u Shellsing Langi da ong u wa kiwa boon wa soi pyrtuid pyrchah ya oo toh kiwa chah pynboor wei em leh ki jooh kiwa soi pyrtuid thok ha ki pyrtuid yong kiwi. Da ong u leh wa kiwa pyrchah toh ki wym hun hanlada leh iwon iwon kiwa yahkhmat ka chnong.
Neiliang kiwa pyrchah da ong ki wa kwah ki wow yoh ya ka Dorbar Chnong katkam ka aiñ wei da kwah ki leh wow pynthymme ya kiwa yahkhmat ka chnong yow yoh kiwa chong chnong yei hok yong ki.
Discussion about this post