U General Secretary ka Federation of Khasi Jaiñtia and Garo People (FKJGP), u Eldie N Lyngdoh da chah pynngat u ha kiwa boon ki kyndon ka aiñ heiyatoh wa ka lai paidbah wa da pynman da ka seiñ ha ka 28 tarik u Naichiphaw hajrong ka phang wym yoh kreh kiwa boon hapoh ka jylla.
Ha kani ka lai paidbah da wan wow emlang leh wa kiwi ki seiñ heiwa hadien ka yalang wa da pynman ha Motphran da lai kjat chadooh cha Madan Iewrynghep (Firebrigade). Wei ha ini i por da chah dat ki bru paidbah da kiwa chimbynta ha kani ka lai kjat heiwa da yoh ki bru wow riñ Video ya ini wa jia heiwa da mih i beiñ na kiwa boon nadooh napoh jylla kamjooh kiwa na baar ka jylla.
Neiliang ki pulit ka Meghalaya da leh ki da ka Suo Motu Case ha Laitumkhrah Police Station waka Sadar Police Station.
U Eldie Lyngdoh da chah pynngat u hapoh ka kyndon 341/324/353/505/506/34 ka Indian Penal Code kiwa yatoh wa i dat wei pynmynsoo bru.
Neiliang yong oo da chim u leh yei bahkhlieh yeiwa jia ha kani ka lai paidbah heiwa chwa ini neiliang u President ka seiñ leh da pynmih u yei paan maap.
Ya u Eldie da phah wan hajiar biang ya oo ha ka 4 tarik uni u bnai.
Kamtæ da phah leh ya oo da ki pulit wym toh u leh u iwon iwon i kaam pyrchah aiñ neini chakhmat, ym toh wow maham bru, wow pynbor ya kiwi wow kylla ktein heiyatoh wa ini i kaam wa chah pynngat u, u krehlang wa ki pulit heiyatoh wa ini i takit, u pynbiang u ya ki kot ki sla wa emkaam wa kiwi kiwi de.
