Ka High Court ka Meghalaya da chong bichaar ko ya ka mukotduma wa da leh da u Lurshaphrang Shongwan heiyatoh wa i thaw sumaar ya kiwa chitom Cancer hapoh ka jylla heiwa da yoh leh yei jubab na u Joint Secretary ka chnat Health & Family Welfare kawa da e lyngba ka Affidavit ha ka 29-11-21 heiwa da chong bichaar yeini ha ka 13 tarik uni u bnai.
Ha ka Affidavit da chem wa ki bru wa chitom Cancer hapoh ka jylla ye ki wow em palat 80,000 ngut wei ka Cancer Wing ka Civil Hospital ha Shillong toh kawa da pynkhreh pynbiang du wow thiah ki kattu katni donhi ki bru wei wow pait leh ya kiwa wan phah sumaar.
Neidaw won wa em leh kiwa chitom kiwa wan na kiwi ki jylla cha Shillong, da emkaam wow pynheh ya ka thaw sumaar wei pynboon ya ki thaw thiah thiah. Ka jylla hei jubab da ong ko leh wa ka Cancer Wing wa em ha Shillong Civil Hospital da krehkaam deiwa em 34 tylli ki thaw thiah kiwa 22 tylli ya ki chynrang wa 12 tylli ya ki kynthai heiwa da pynthiah leh cha kiwi ki Ward wei em leh kiwa da hap wow thiah hapoh ki Private Ward.
Ka sorkar hei jubab da kdaw ko leh wa i myllieñ ki bru wow baam kwai baam duma da man ko i daw wa boon bha kiwa yoh Cancer.
Da chem leh wa hei jubab wa da e da em du kawi ka kamra (Room No.25) kawa da pynemkaam kam ka Cancer Treatment Centre wei heijooh i por da pynman leh kam ka thaw wow pait ya kiwa wan phah sumaar.
Kamtæ ka yung bichaar da ong ko wa emkaam wa i thaw sumaar ya kiwa chitom Cancer toh u pynheh ka wei wow booh leh da kawa man kyrpang namo ka Specialised Cancer Treatment Centre wei ka jylla toh u paan poisa ko naka sorkar pyrdi yow ye u booh ya kani ka thaw sumaar khamtam neidaw wa boon kiwa yoh Cancer na ki daw i rukom im ki bru.
Hajrong ini da e por biang ya ka sorkar jylla wow e jubab ko hapoh soo tayaw kammon wow leh yeini wa boon kiwa chah ktah ha ka Cancer wei daw bichaar hadien kammon wow pynheh ya ka thaw sumaar.
Ya kani ka mukotduma daw bichaar biang ha ka 21-02-22.
