Khliehriat: U Deputy Commissioner, East Jaiñtia Hills District da pynbna paidbah u wa da bichaar wei pyrkhat bniah yei dooh ya ki mynsien bru, i mynsoo ki bru wei i yap ki mrad kam ki Masi, ki blang deiwa haap ha ki thlu wa tih mooyong kiwa da ieh chrah næ kiwa dang em mooyong wei katkam i chem ka NGT Committee wa kini ki thlu mooyong booh ki hei maa ya waroh lada khlem chimkhia ki bor chnong wa neiliang ki tre mooyong.
Heiyatoh wa ini da kyrpaad wei da phah wa waroh ki chnong wa katkam ka hukum (Order) na u Chairman ka NGT Committee, U Justice B.D Aggarwal da phah u wa emkaam wow kær ya kini ki thlu mooyong wa da ieh chrah wei kiwa dang em mooyong namo deiwa pyndap noh ya kiwa ym emkaam de da i khyndaw yow lait nei maa.
Chooh chooh ya ini i kær soodong ya kini ki thlu, ka chnong toh u paan ko ya ka bai lutsan na ki tre paar, ki malik mooyong wa pynkreh ya kini ki paar namo da ka poisa chnong neibhah i myntoi toh wow yada ya kiwa chong chnong, ki tre chnong, ki khon ki kti, ki khynnah, ki mrad wa kiwi kiwi.
U Deputy Commissioner da phah u leh ya waroh ki Waheh Chnong wow e ya ka bui (Report) wei wow pynpoi ya ki cha ka yung krehkaam u DC hapoh 20 sngi khnang wow ye u pynpoi ya ka ryngkat wa ki pyrtuid ki chnong cha ka NGT Committee.
